Keçid linkləri

Təcili xəbərlər
2020, 10 Avqust, Bazar ertəsi, Bakı vaxtı 01:09

Hava qurumunun rəhbər işçiləri nazirin bağına peyin daşıyırmış


Keçmiş Ekologiya və Təbii Sərvətlər naziri Hüseynqulu Bağırov

Ekologiya və Təbii Sərvətlər Nazirliyinin Milli Hidrometeorologiya Departamentinin baş mühasibi olmuş İlqar Hacıyev keçmiş nazir Hüseynqulu Bağırovu yeyintidə suçlayır. Onun iddiasına görə, təkcə çalışdığı departamentin rəhbəri hər ay nazirə 10 min manat çatdırırmış. Həmin pullar adları işçi kimi göstərilən, amma işləməyən şəxslərin maaş kartlarındakı vəsait hesabına ödənilirmiş.

İ.Hacıyev bütün bunları öz məhkəməsində söyləyib. O, departamentin keçmiş rəhbəri Əkbər Həsənov və bu qurumun daha üç işçisi - Orxan Qasımov, Tural Hacızadə Təbriz Əliyevlə birlikdə Bakı Ağır Cinayətlər Məhkəməsində hakim önünə çıxarılıb. Bu şəxslər müxtəlif adamların adına açılmış maaş kartlarına köçürülən pulları mənimsəməkdə suçlanır. Söhbət toplam 451 min manatdan gedir. Təqsirləndirilən 5 nəfərdən yalnız İ.Hacıyev həbsdədir. Qalan 4 nəfər haqqında məhkəmənin yekun hökmünədək polis nəzarətinə vermə-qətimkan tədbiri seçilib.

Adlarına maaş yazılanlardan 27 nəfər zərərçəkmiş kimi tanınıb. Onların bir çoxu, ara-sıra, kənardan texniki xidmət göstərən, ştatda olmayan və ya işə yeni cəlb edilənlər olub və əksəriyyəti özünü zərərçəkən saymır. Məhkəməyə də bu prosesə qatılmaq istəmədiklərini, gördükləri işin əvəzində nağd pul aldıqlarını yazılı şəkildə bildiriblər.

«Nazir idi, istədiyini edə bilirdi»

Sözügedən cinayət işində Ekologiya və Təbii Sərvətlər Nazirliyi də zərərçəkmiş statusundadır. Nazirlik 451 min manatın ödənilməsi üçün mülki iddia qaldırıb. Təqsirləndirilən şəxslərdən Əkbər Həsənov istintaqın gedişində 451 min manatın 300 minini ödəyib. İ.Hacıyevin iddiasına görə, həmin məbləği pul vaxtilə ona çatdığından keçmiş Ekologiya və Təbii Sərvətlər naziri Hüseynqulu Bağırov ödəyib: «2018-ci ildə, prezident seçkisinə hazırlıq dövründə nazir Əkbər Həsənovu çağırıb, 265 min manat istədi. Bunun 215 mini Salyanda iki zavodun tikintisindən ötrüydü, 50 min də prezident seçkilərinə görə. Əkbər Həsənov nazirin tələbini gəlib çatdıranda dedim ki, çox risklidir. Mən də, Əkbərin özü də işdən çıxmaq istəyirdik. Ancaq Əkbər deyirdi ki, çıxsaq da, Hüseynqulu Bağırovun əlindən qaça bilmərik. Nazir idi, istədiyini edə bilirdi. Əkbər işlədiyimiz firmalardan birinin rəhbəri Vüqardan 10-12 faizlə pulu alıb, nazirə verdi. Dəfələrlə Əkbərə xəbərdarlıq elədim ki, bu pulu qaytara bilməyəcəyik, o isə nazirlə danışdığını deyirdi. Hüseynqulu Bağırov demişdi ki, prezident seçkisindən sonra yenə nazir təyin edilsə, pulu tam qaytaracaq. Amma elə oldu ki, pulu verəndən bir neçə ay sonra vəzifədən çıxarıldı».

İ.Hacıyev onu da bildirir ki, pulu qaytarmaqdan ötrü adı işçi siyahısında olan, əslində işləməyənlərin maaş kartlarından yararlanıblar. Onun sözlərinə görə, kartların sayından da, siyahıdakı adlardan da Ə.Həsənovun xəbəri varmış. Keçmiş baş mühasib iddia edir ki, nazirlikdə boş iş yerləri olub. Məsələn, sovet dövründən qalan topçular, raketçilər, mühəndislər... Belə vakansiyalara maaş ayrılıb.

İ.Hacıyev: «Biz tələsirdik ki, aldığımız borcu qaytaraq»

Çalışdığı departamentin rəisinin kartlardan çıxarılan pullardan hər ay 10 min manat keçmiş nazirə verdiyini vurğulayan İ.Hacıyevin sözlərinə görə, bu üzdən onların gördükləri işdə heç bir problem yaranmazmış. Ancaq yeni nazir təyinatından sonra vəziyyət dəyişib, audit yoxlaması təyin edilib. Elə 451 min manatlıq yeyinti də bu yoxlama zamanı üzə çıxıb: «Biz tələsirdik ki, aldığımız borcu qaytaraq, özümüzə qazanc götürmürdük. Audit yoxlamalarından sonra bu məsələlər üzə çıxanda Əkbərlə Hüseynqulu Bağırovun qəbuluna getdik. Qərb Universitetinin qarşısında gözlədik, amma bizi qəbul eləmədi. Onun mətbuatdakı işlərinə baxan bir nəfərlə görüşdük, baş verənləri ictimailəşdirəcəyimizi dedik. Bundan sonra Hüseynqulu Bağırovun vəkili bizimlə əlaqə saxladı, 300 min manatı verdi. Yəni Əkbər Hüseynqulu Bağırovun verdiyi 300 mini öz adından ödəyib. Keçmiş nazir qalan hissəsini də ödəməliydi, amma ödəmədi».

Nazirlikdə işlədiyi dövrdə nazirin bir xeyli qeyri-rəsmi göstərişlərini yerinə yetirdiklərini deyən İ.Hacıyev bütün bunlar haqda artıq susmaq istəmədiyini vurğulayıb.

O, birgə mühakimə olunduqları şəxslərdən, Ə.Həsənovu çıxmaqla, digər üç nəfərin günahsız olduğunu da söyləyib. Onun sözlərinə görə, bütün işləri Ə.Həsənov görüb, o da nazirin göstərişini icra edib: «Əkbər indi həqiqətləri danışmır, ad çəkmir. Biz dəfələrlə rayonlardan nazir Hüseynqulu Bağırovun üzüm bağları üçün peyin axtarmışıq. Nazirin Qərb Universitetinin yeni korpusu tikiləndə nə qədər işləri biz görmüşük. Bunlar havayı deyildi. Pulsuz bu işləri görmək olardı? Daha susmaq yoxdur. Ya mən və digər təqsirləndirilən şəxslər bəraət alacağıq, ya da Əkbər Həsənov və Hüseynqulu Bağırov da həbs olunacaq».

İ.Hacıyev söylədiklərini doğrulayan səsyazı və telefon danışıqlarının olduğunu da bildirib.

Ə.Həsənov: «Etiraf edirəm ki, sənədləşmə işləri aparılmayıb»

Təqsirləndirilən Ə.Həsənovun özü də sualları cavablarkən, rəhbərlik etdiyi departamentin birbaşa nazirə tabe olduğunu təsdiqləyib. Sadəcə, cinayət işində bəhs olunan 451 min manatın internetə, telefon xətlərinə, kommunikasiya işlərinə, itkin düşən alpinistlərin axtarışına və s.-ə xərcləndiyini söyləyib.

Ə.Həsənov departamentdə 80 nəfərin adına kart açılmasından, aylıq maaş ayrılmasından xəbərsiz olduğunu deyib: «Mənim bildiyim 25-30 kart idi. Onlara da aylıq 6-7 min manat yığılırdı. 80 kartdan xəbərim yoxdur».

O, başqa adamların adına maaş kartının açılmasında baş mühasibi günahlandırır.

2018-ci ildə keçmiş nazir H.Bağırovun onu çağırıb 265 min manat istəyib-istəmədiyi barədə sualı Ə.Həsənov, əslində, cavabsız qoyub: «Bütün işlər görülüb. Etiraf edirəm ki, sənədləşmə işləri aparılmayıb. Buna görə də indi həmin məbləğ mənimsəmə və israf kimi qiymətləndirilir. Nazirə demirdim, öz işimizin xətrinə edirdim».

300 min manat ödənilsə də, qalan 151 min manatın ödənilməməsini Ə.Həsənov belə əsaslandırıb: «İlqara dedim ki, artıq olan olub, biz bunu ödəməliyik. İlqar da 151 mini ödəyəcəyi haqda istintaqa ərizə yazdı. Amma ödəmədi deyə, iş bu yerə gəlib çıxdı».

Məhkəmədə səslənən suçlamalarla bağlı keçmiş nazir H. Bağırovun fikrini öyrənmək mümkün olmayıb.

Təqsirləndirilən şəxslərə CM-in 179.3.2 (külli miqdarda ziyan vurmaqla dələduzluq), 313 (vəzifə saxtakarlığı) və başqa maddələrlə ittiham verilib. Bu maddələrdə 10 ilədək həbs cəzası nəzərdə tutulub.

Ə.Həsənov 2012-ci ildən Milli Hidrometeorologiya Departamentində rəhbər vəzifələrdə - direktor müavini və direktor çalışıb. O, Muxtar Babayev nazir təyin ediləndən sonra vəzifəsindən çıxarılıb.

XS
SM
MD
LG