Keçid linkləri

2024, 28 Mart, Cümə axşamı, Bakı vaxtı 20:03

Hafiz Məmmədova yaxın şirkətlər ləğv olunur


Hafiz Məmmədov
Hafiz Məmmədov

Azərbaycanda yenidən təşkil olunaraq ləğv edilən 30 şirkətin bəzisi bu və ya digər şəkildə daşımaçılıq və biznesin başqa sahələrində tanınan, ancaq son vaxtlar biznesin qürub dövrünə qədəm qoyan Hafiz Məmmədova bağlıdır.

AzadlıqRadiosu şirkətlərlə bağlı Vergilər Nazirliyinin yönəltdiyi məlumat bazasındakı bilgiləri təhlil edərək bu qənaətə gəlib.

Ortaq qərar

Oktyabrın 12-də 31 şirkət ortaq qərarını açıqlayıb. Qərara görə, onların 30-u bir şirkətə - «Ram-Nur» MMC-yə qoşularaq ləğv olunurlar. Bunların arasında işadamı Hafiz Məmmədovun oğlanlarına məxsus KSM Şirkətlər Qrupunun ən azı iki üzvü – «Elit Catering Company» və «Candy Baku» MMC-lər də var.

Buna da bax:​ Hafiz Məmmədov: «Mənə zərbəni Eldar Mahmudovun oyunları vurdu»

KSM Şirkətlər Qrupunun korporativ saytı bağlanmazdan öncə, qrup bu şirkətləri öz strukturunda təqdim edib.

«Candy Baku» MMC-nin təsisçisi və direktoru olan Eldar Rasim oğlu İsmixanov KSM Şirkətlər Qrupunun başqa bir üzvünə - «KSM Property» MMC-yə rəhbərlik edir. Onun atası Allahverdi isə qrupun digər şirkətinin - «BQ-Trans» MMC-nin direktorudur.

Eyni ünvanda qeydiyyata alınıblar?

Ləğv olunan şirkətlərin böyük əksəriyyəti, o cümlədən onların qoşulduğu «Ram-Nur» MMC də Hafiz Məmmədovun sahibi olduğu «Baghlan Group» FZCO (Birləşmiş Ərəb Əmirliklərində - BƏƏ-dir) şirkətinin Azərbaycandakı nümayəndəliyinin yerləşdiyi ünvanda – Bakı şəhəri, Həsən Əliyev küçəsi, 24 nömrəli binada qeydiyyatdadır.

Buna da bax:​ Hafiz Məmmədovun şirkəti Virgin adalarında müflis elan edilir

Yaxud «A-Trade» MMC isə Hafiz Məmmədovun BƏƏ-də yaratdığı «Baghlan Group»un Bakıdakı filialının başqa bir ünvanında – Şəmsi Rəhimov küçəsi, ev 45-də dövlət qeydiyyata alınıb. Rəsmi məlumata görə, onun yeganə təsisçisi Fəxrəddin Səlimovdur. «A-Trade» MMC-nin direktoru Ramin Mehdiyevin qardaşı Kamal Mehdiyev «Bakı» peşəkar idman klubunun direktorudur. İş dünyasında həm də «Hafka» kimi tanınan Hafiz Məmmədov bu klubun prezidentidir.

Ləğv olunan şirkətlərin böyük bir hissəsi 2008-2012-ci illərdə - kommersiya qurumlarının təsisçiləri haqda məlumatların ictimaiyyətə açıq olduğu dövrdə qurulub. Həmin məlumatlardan onları ayrı-ayrı şəxslərin yaratdığı üzə çıxır.

Çoxunun nə iş gördüyü bilinmir

Otuz şirkəti öz içində əridən «Ram-Nur» MMC haqqında isə ictimaiyyətə, demək olar, heç nə məlum deyil. 2012-ci ilin avqustunda yaradılan şirkətin, elə digər 30 şirkətin də çoxunun nə işlə məşğul olduğu bilinmir. Ötən ilədək «Elit Catering Company» və «Candy Baku» MMC-lər qida sektorunda çalışıb. KSM Şirkətlər Qrupu bəyan edirdi ki, «qrupa onlarla şirkət daxildir».

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG