-
Meydan TV-nin redaktoru Günel Mövludun həbsdə olan qardaşlarının aprelin 29-da azadlığa buraxıldığı bildirilir.
G.Mövludun özü də bu barədə Facebook səhifəsində belə yazıb:
«Qardaşlarımı buraxıblar. Hamıya dəstəyə görə təşəkkür. Ümid edirəm, onları buraxıb, daha pis şeylər etməyəcəklər».
Musavat.com xəbər verir ki, G.Mövludun valideynləri bu məsələ ilə bağlı danışmaq istəməyiblər.
APA-nın xəbərində isə deyilir ki, G.Mövludun qardaşları Vəkil və Raci İmanovlar cəzalarının bir hissəsini çəkdiklərindən məhkəmə qərarı ilə azadlığa buraxılıblar.
Ötən il oktyabrın 13-də Meydan TV-nin redaktoru G.Mövludun qardaşları - Raci və Vəkil İmanovları polis saxlamışdı. Qardaşlar narkotik maddələrin qanunsuz dövriyyəsində ittiham olunaraq həbs ediliblər.
Cinayət Məcəlləsinin 234.1-ci (satış məqsədi olmadan şəxsi istehlak miqdarından artıq narkotik əldə etmə və ya saxlama) maddəsi ilə ittiham olunan Vəkil İmanov Biləsuvar rayon Məhkəməsinin dekabrın 22-də çıxardığı hökmlə 1 il həbs cəzası almışdı.