Keçid linkləri

Təcili xəbərlər
2018, 18 İyul, çərşənbə, Bakı vaxtı 07:16

Hacıkənddə hələ də evinə yığışa bilməyənlər var


Hacıkənddə sel. 2010

«Dolu pəncərələrimizi, dam örtüyümüzü sınıq-sınıq edib, evləri qəzalı vəziyyətə salıb, kənd təsərrüfatımız tamamilə məhv olub. Məhəllədəki maşınlar əzik-əzikdir. 3 gündür ev-eşiyimizdən didərgin düşmüşük».

Bunu AzadlıqRadiosuna Gəncənin Hacıkənd qəsəbəsinin sakini Damət Şükürov deyir.

İyunun 20-də qəsəbəyə yağan leysanı dolu əvəzləyib. Güclü dolu qəsəbədəki 100-dən çox evə və qəsəbənin infrastrukturuna ciddi ziyan vurub. Sakinlər hələ də ev-eşiklərinə dönə bilmədiklərini qeyd edirlər.

«HANSI EVİMDƏ OTURUM?»

D.Şükürovun şikayəti zərərin aradan qaldırılmamasındandır:

«3 gün keçib, gəlib baxıb gediblər, ancaq hələ heç bir iş görülməyib. Gözləyirlər ki, adamlar özləri qollarını çırmalasın. Adamlarda da pul yoxdur. İşi, gücü olmayan sadə kəndli bu boyda təbii fəlakətin vurduğu zərərin qarşısında dayana bilməz. Səsimizin rəsmi qurumlara çatdırılmasını istəyirik. İcra hakimiyyətinə getdim, dedilər ki, get otur evində, başçı özü məsələylə məşğuldur. Hansı evimdə oturum? Evim suyla dolub, 8-nəfərlik ailəylə küçədə qalmışam».

Qəsəbə sakini Günel Zeynalova da eyni durumdan şikayətçidir:

«İki azyaşlı uşaqla qohum evinə gəldim. Yoldaşım həbsdədir. Evin dam örtüyündə o qədər deşik açılıb ki, örtük demək olar ki, tamamilə yoxdur. Şüşələr qırıq-qırıqdır, həyətdəki meyvə ağacları məhv olub. Meyvəsini yığıb, satıb uşaqları dolandırırdım. Xahiş edirəm, bir çarə etsinlər, evimizə yığışaq».

«MADDİ ZƏRƏR ARAŞDIRILIR»

Gəncənin icra hakimiyyətindən «Qaynar xətt»ə bildirilib ki, dolu yağıntısından dərhal sonra icra hakimiyyətinin başçısı Hacıkəndə gedib, zərər dəymiş evləri görüb, tapşırıqlarını verib:

«3 gündür maddi zərər araşdırılır. Artıq Fövqəladə Hallar Komissiyası tərəfindən evlərə dəymiş zərərlərin aradan qaldırılması üçün işlər aparılır. İnfrastruktur və başqa sahələr qaydasına düşüb».

İcra hakimiyyətindən bildirilib ki, dolu nəticəsində 114 evin dam örtüyü, pəncərələri qırılıb, bəzi evlərə sel suları dolub. Obyektlərə, əkin sahələrinə və 15-dək avtomobilə ciddi zərər dəyib. Qoşa bulaq yararsız hala düşüb.

Təkcə iyun ayı ərazində Gəncə, Qazax, Ağstafa, Daşkəsən və Göygöl rayonlarına yağan güclü yağış və dolu şəxsi evlərə, sosial obyektlərə, kənd təsərrüfatına, infrastruktura xeyli zərər vurub.

Siz də şikayətinizi buradan göndərə bilərsiz

ƏLAQƏ ÜÇÜN

Çəkdiklərinizi, eləcə də şikaylətlərinizi bizə WhatsApp-dan başqa,

XS
SM
MD
LG