Keçid linkləri

Təcili xəbərlər
2018, 25 İyun, Bazar ertəsi, Bakı vaxtı 17:53

Rusiya öz agentlərini niyə həbs edir?


Moskvada FTX-nin baş idarəsi

Rusiya mediasının xəbərlərinə görə, Federal Təhlükəsizlik Xidmətinin (FTX) daha bir zabiti dövlətə xəyanət ittihamı ilə həbs olunub.

AzadlıqRadiosunun müxbiri Mike Eckel bu həbsin Rusiyanın ABŞ-ın prezident seçkisinə müdaxiləsi ilə əlaqədar ola biləcəyini bildirir.

O yazır ki, bundan əvvəl Rambler News Service saytının yanvarın 26-da verdiyi xəbərə görə FTX-nin mühüm departamentlərindən biri olan kiberkəşfiyyat idarəsinin yüksək rütbəli zabitinin həbs edildiyini xəbər vermişdi. Bu xəbəri bir gün əvvəl nüfuzlu Kommersant qəzeti də yaymışdı.

Kommersant yazırdı ki, FTX-nin İnformasiya Təhlükəsizliyi Mərkəzinin rəis müavini Sergey Mixaylov dekabr ayında dövlət xəyanəti ittihamı ilə həbs olunub.

Daha bir Rusiya qəzeti - Novaya Gazeta yanvarın 26-da Kommersantın bu xəbərini təsdiq edib.

Novaya Gazeta anonim mənbələrə əsasən yazır ki, Mixaylov Moskvada başqa FTX zabitlərinin iştirak etdikləri iclasda həbs olunub.

Bu da xəbər verilir ki, dekabr ayında həbs olunan başqa bir agent Rusiyanın məşhur Kasperski Laboratoriyası (Kaspersky Lab) kibertəhlükəsilik şirkətinin menecerlərindəndir.

Baş müstəntiq həbs olunub

Kasperski Laboratoriyası AzadlıqRadiosuna bu həbs barədə xəbəri təsdiq edib və bildirib ki, Ruslan Stoyanov adlı bu şəxs şirkətin istintaq şöbəsinə rəhbərlik edirmiş.

LinkedIn saytından belə görünür ki, StoyanovKasperski Laboratoriyasında 2012-ci ildən işləyib və onun əvvəlki iş yerlərindən biri də Rusiya Daxili İşlər Nazirliyinin kibercinayət idarəsi olub.

Yanvarın 26-da Rambler News və REN-TV-nin verdiyi xəbərə görə ötən ay FTX-nin başqa bir agenti də həbs olunub. Onun adı mayor Dmitri Dokuçayev olaraq verilir.

Dokuçayev İnformasiya Təhlükəsizliyi Mərkəzində başqa bir bölməyə rəhbərlik edib və bəzi xəbərlərə görə yuxarıda adı çəkilən Mixaylovun tabeçiliyində fəaliyyət göstərib.

AzadlıqRadiosu müxbiri diqqəti buna çəkir ki, bu həbslər ABŞ kəşfiyyat orqanlarının Rusiya tərəfindən dəstəklənən hakerlərin ABŞ seçkisinə müdaxiləsini araşdırdığı bir vaxta təsadüf edir. ABŞ kəşfiyyat orqanları bundan əvvəl Rusiya hökumətini Demokratik Partiyanın emaillərinə və prezident seçkisinə haker müdaxiləsində ittiham etmişdi.

Özünün son sərəncamlarından birində Barack Obama ABŞ kəşfiyyatının gəldiyi bu nəticələri rəsmən qəbul etdiyini bildirmişdi. Bu sərəncamda haker müdaxiləsinin arxasında Rusiya FTX və Baş Kəşfiyyat İdarəsinə (hərbi kəşfiyyat) bağlı 9 Rusiya rəmsinin və bir neçə Rusiya orqanının durduğu deyilirdi.

Yanvarın əvvəllərində ABŞ kəşfiyyatının başçısı Senat dinləməsinə bildirmişdi ki, ABŞ-ın seçki prosesinə misli görünməmiş kibermüdaxilə həyata keçirilib.

FTX rəsmiləri şərh vermirlər

Rusiyada Kremlə sədaqətli biznesmenlərdən birinə məxsus olan Tsargrad TV xəbər saytı bildirib Mixaylov Rusiyada Şaltay-Boltay adı ilə tanınan haker qrupu ilə əlaqəli olub.

Həmin haker qrupu Rusiyanın tanınmış rəsmiləri və bizmesmenlərinə aid e-mailləri dərc etmişdi. Qrup bu sənədlərin kiberhücum nəticəsində əldə olunduğunu bildirirdi.

FTX bu təhqiqat barədə heç bir rəsmi açıqlama verməyib.

Novaya Gazeta xəbər verir ki, Mixaylov, Dokuçayev və Stoyanovdan başqa bu təhqiqatla bağlı daha iki nəfər həbs olunub və onlardan biri Mixaylovun FTX həmkarıdır.

Qəzet yenə də anonim mənbələrə istinadən yazır ki, Mixaylov Rusiya vətəndaşı Vladimir Fomenkonun mülkiyyətində olan King Servers adlı hostinq xidməti barədə məlumatları ABŞ kəşfiyyatına ötürməkdə şübhəli bilinir.

AzadlıqRadiosu yazır ki, King Servers hostinqindən hakerlər ötən il Arizona və İllinoys ştatlarındakı seçki kompüter sisteminəkiberhücum üçün istifadə etmişdilər.

Fomenko öz növbəsində hakerlərlə hər hansı əlaqədə olduğunu inkar edir.

Novaya Gazeta yazır ki, Fomenko həm də Pavel Vrublyovski adlı başqa bir Rusiya sahibkarı üçün internet serveri xidməti məkanı verib. Vrublyovski Chronopay adlı elektron ödəniş şirkətinin sahibi olub və 2013-cü ildə Rusiya şirkətlərinə kiberhücumlarda ittiham edilib.

Deyilənlərə görə, Mixaylov istintaq vaxtı Vrublyovskini tanıdığını və onun “istedadlarından” xəbərdar olduğunu deyib.

Günün bütün mövzuları

XS
SM
MD
LG