Formula 1 Azərbaycan Qran-Prisinin qalibi bəlli olub.
Formula 1 Azərbaycan Qran-Prisinin qalibi “Mercedes” komandasının pilotu Luis Hamilton olub.
İkinci yeri Kimi Raykonnen (“Ferrari”), üçüncü yeri isə Serxio Peres (“Force India”) tutub.
***
Aprelin 29-da Bakıda Formula 1 Azərbaycan Qran-Prisinin əsas mərhələsinə start verilib. Əvvəlcə pilotların paradı və açılış mərasimi keçirilib.
AZƏRTAC-ın xəbərinə görə, prezidenti İlham Əliyev və xanımı Mehriban Əliyeva Formula 1 üzrə dünya çempionatının dördüncü mərhələsinin - Azərbaycan Qran-Prisinin əsas yarışına baxırlar.
Paradda və himn mərasimində pilotları azyaşlılar müşayiət ediblər. Sonra Azərbaycanın dövlət himni ifa edilib.
Dövlət himninin ifa olunmasından sonra Formula 1 Azərbaycan Qran-Prisinin 51 dövrədən ibarət final mərhələsinə start verilib.
Bakı trekinin uzunluğu 6 kilometr, ümumu məsafəsi isə 306 kilometrdir. Bakıda Formula 1 Azərbaycan Qran-Prisinə aprelin 27-də start verilib. Yarışın birinci günündə pilotlar Bakı trekində iki sərbəst yürüşdə güclərini sınayıblar. Aprelin 28-də keçirilmiş sıralanma yürüşündən sonra isə Qran-Pridə pilotların düzülüşü müəyyənləşib.
Formula 1 Azərbaycan Qran-Prisi çərçivəsində Bakıda Formula 2 yarışları da keçirilib.
2016-cı ildə Bakıda keçirilən Formula 1 Avropa Qran-Prisinin qalibi “Mercedes”in almaniyalı pilotu Niko Rosberq olub.
2017-ci il isə Formula 1 Azərbaycan Qran-Prisi “Red Bull Racing” komandasının avstraliyalı sürücüsü Daniel Rikkardonun qələbəsi ilə başa çatıb.
Xatırlatma
Azərbaycanda Formula-1 yarışları bu il üçüncü dəfədir ki, keçirilir. Buna qədər bu yarışlar Azərbaycanda 2016-cı və 2017-ci illərdə keçirilib. Bu yarışlar, razılaşmaya əsasən, Azərbaycanda 2019 və 2020-ci illərdə də təşkil edilməlidir. Azərbaycan rəsmilərinin bildirməsinə görə, əvvəlcədən razılaşdırılmış bu haldan imtina edərlərsə, ölkəni 50 milyon dollar cərimə gözləyir.
Ancaq rəsmilər ümumilikdə Formula-1 yarışlarına nə qədər xərc çəkildiyini açıqlamırlar. Azərbaycan müxalifəti baş verənləri israfçılıq sayır.