Bu gün – martın 20-də ABŞ-ın Federal Təhqiqatlar Bürosunun (FBI) direktoru James Comey Nümayəndələr Palatasının kəşfiyyat komitəsində ifadə verəcək. Komitə Rusiyanın 2016-cı il ABŞ prezident seçkilərindəki rolunu araşdırır. Comey-in bu məsələylə bağlı çoxdan gözlənən sualları, eləcə də prezident Donald Trump-ın danışıqlarının dinlənməsi barədə sualları cavablandıracağı gözlənilir.
«Fox News» yazır ki, cümə günü Ədliyyə Departamenti Komitəyə Trump-ın prezident seçkisi zamanı danışıqlarının dinlənməsi iddiasına dair xahiş olunan informasiyanı verib. Amma komitə sədri, Kaliforniyadan olan respublikaçı Devin Nunes onlara hansı informasiyanın göndərildiyini açıqlamayıb. O, «Fox News Sunday» proqramına bildirib ki, Obama administrasiyasının «Trump Tower»i dinləməsi barədə əlində sübut-dəlil yoxdur.
ADLARIN SIZDIRILMASI
«Prezident cismən gedərək nəyisə dinləmir. Burada digər məsələ adların açıqlanması, sızdırılmasıdır. Keçmiş milli təhlükəsizlik müşaviri Michael Flynn-lə bağlı bunun şahidi olduq. Bizi əndişələndirən odur ki, adların açıqlanmasına hansısa formada nəzarət olunurmu», – Nunes belə deyib.
Yada salaq ki, M.Flynn Ağ evin milli təhlükəsizlik məsələləri üzrə müşaviri vəzifəsində cəmi 3 həftə qalıb. Onun ruslarla bağlılığı haqda yazılardan sonra prezident D.Trump onu istefaya göndərib. Kəşfiyyat M.Flynn-in Rusiya səfiriylə tez-tez ünsiyyətdə olduğunu, hətta səlahiyyətlərini aşaraq səfirlə ABŞ-ın Rusiyaya sanksiyalarını müzakirə etdiyini üzə çıxarmışdı.
James Comey-in Rusiya məsələsindən az danışması konqresmenləri qıcıqlandırıb, onu yollarına daş qoymaqda suçlayıblar.
Komitədə Milli Təhlükəsizlik Agentliyinin direktoru Mike Rogers də ifadə verəcək.
SENAT DA DİNLƏMƏ KEÇİRƏCƏK
Senatın kəşfiyyat komitəsi, FBI-nın özü də Rusiyanın seçkidəki rolunu araşdırır.
ABŞ kəşfiyyatı Rusiyanın 2016-cı il prezident seçkisinə müdaxilə etməsi qənaətinə gəlib. Seçki vaxtı Demokratik Milli Komitənin, demokratların prezidentliyə namizədləri Hillary Clinton-un seçki kampaniyasına məxsus e-mail-lər oğurlanıb və ictimaiyyətə açıqlanıb.
Nunes dinləmələrlə bağlı bazar günü deyib ki, «ilk dəfə olaraq, Amerika xalqı və bütün siyasi partiyalar Rusiyanın yaratdığı təhlükəyə diqqət ayırırlar».
Ötən həftənin əvvəlində Komitə ölkənin 3 kəşfiyyat agentliyinə yazaraq 2016-cı ilin iyunundan bu ilin yanvarınadək haqqında kəşfiyyat bilgiləri toplanan amerikalılar barədə ayrıntıları istəyib. Komitə bilmək istəyir ki, bir vətəndaşın neçə söhbəti araşdırılıb, onların kimliyi açıqlanıbmı, bu zaman hüquqi tələblərə əməl edilibmi.
Ötən həftə Senatın kəşfiyyat komitəsi də martın 30-da oxşar dinləmə keçirəcəyini elan edib. Şahidlərin birinci paneli Rusiyanın təsir kampaniyalarının tarixi, ikinci qrupsa Rusiyanın bu fəaliyyətlərə dəstəkdən ötrü kiberəməliyyatlarından necə yararlanmasından danışacaq.
Dinləmələrdə keçmiş kəşfiyyat rəsmiləri, biznes və akademik sektor təmsilçiləri də ifadə verəcəklər.