Keçid linkləri

Təcili xəbərlər
2021, 09 Mart, çərşənbə axşamı, Bakı vaxtı 02:53

Erdoğan ABŞ-ı PKK-ya görə ittiham edir


Türkiyə prezidenti Recep Tayyip Erdoğan Birləşmiş Ştatları kürd silahlılarını dəstəkləməkdə ittiham edib.

Fevralın 15-də Ankaradan verilən xəbərlərdə deyilir ki, 13 türk oğurlandıqdan sonra İraqın şimalında edamsayağı öldürülüb.

Reuters yazır ki, Erdoğan ABŞ-ın bu hadisəni pisləməsini “zarafat” adlandırıb.

Türkiyədən alınan xəbərlərdə deyilir ki, fevralın 13-də qadağan olunmuş Kürdüstan İşçi Partiyası – PKK silahlıları, aralarında hərbçi və polislər də olan girovları qəddarcasına öldürüblər.

Bu hadisə Türkiyə hərbiyyəsinin PKK-ya qarşı keçirdiyi əməliyyatdan sonra baş verib.

Birləşmiş Ştatlar bu hadisənin ardınca Vaşinqtonun Ankaranı dəstəklədiyini və əgər qətllərin PKK tərəfindən törədildiyi təsdiqlənərsə bu təşkilatı pisləməyə hazır olduğunu bildirib.

"Zarafat" kimi bəyanat

Birləşmiş Ştatlar və Avropa İttifaqı PKK-nı terrorçu təşkilat hesab etsələr də, ABŞ Suriyada ekstremist İslam Dövlətinə qarşı döyüşən kürd YPG qruplaşmasına dəstək verib.

Ankara YPG-nin PKK-nın bir qolu olduğunu bildirir.

Erdoğan Qara dəniz sahilindəki Rize şəhərində hakim partiyanın tərəfdarları qarşısında etdiyi çıxışda deyib:

“İndi də Birləşmiş Ştatlar bəyanat verib. Zarafatdır bu. Siz axı, gərək PKK və YPG-yə qarşı olaydınız. Siz aşkar şəkildə onları müdafiə edirsiniz və arxalarında dayanmısınız”.

Co Bayden ötən il ABŞ prezidenti seçiləndən bəri Türkiyə dəfələrlə Vaşinqtonla münasibətləri yaxşılaşdırmaq istədiyini bildirib.

Lakin ABŞ-ın YPG-yə dəstəyi Ankaranı daim qəzəbləndirib və bu məsələ iki NATO müttəfiqi arasında ixtilaf səbəbi olaraq qalır.

“PKK və Türkiyə arasında seçim edin”

Erdoğan bəyan edib ki, Türkiyə sərhəd üzərindən İraqdakı PKK-çılara qarşı əməliyyatlarını davam etdirəcək.

Türkiyə hökumət qüvvələri və kürd separatçılar arasında davam edən münaqişədə indiyədək 40 min nəfər həyatını itirib.

Erdoğan ABŞ və Türkiyənin müttəfiq olduqlarını xatırladıb:

“Əgər biz sizinlə birlikdə NATO-dayıqsa, birliyimizi davam etdiririksə, deməli, siz bizə münasibətdə səmimi olmalısınız”.

Prezident deyib ki, heç kəs Türkiyənin sərhəd üzərindən İraq və Suriyada keçirdiyi əməliyyatları pisləyə bilməz.

O əlavə edib ki, ölkələr Türkiyə və PKK arasında seçim etməlidirlər.

Şərhlər

XS
SM
MD
LG