Keçid linkləri

2024, 29 Mart, Cümə, Bakı vaxtı 13:50

Azəbaycan zənginlərinin adları 'Dubay əmlakı' araşdırmasında


 Arzu Aliyeva
Arzu Aliyeva

Mütəşəkkil Cinayətkarlıq və Korrupsiyanı Xəbərləmə Layihəsinin – OCCRP-nin Mütərəqqi Müdafiə Araşdırmaları Məkəzi C4ADS-la birgə apardığı yeni araşdırmanın nəticələri dərc edilib.

Son təhqiqat yazısı Dubayın gəlhagəlli daşınmaz əmlak bazarı barədə faktları təqdim edir.

Hesabatda deyilir ki, bu bazar dünya boyunca zəngin investorlara təkcə sərmayə qoymaq imkanı yaratmayıb, onları həm də adlarının tam məxfiliyini təmin edib. İndiyə qədər.

Materiallarda jurnalistlərin Dubayda mülkiyyət haqda əldə etdiyi məlumatlardan istifadə edilib.

Bu məlumat bazasında 181 ölkədən olan 129 min sahibkara aid 54 min mülk ünvanı var.

Hesabatda qeyd olunur ki, adları sızmış şəxslərin arasında sanksiya altında olan fərdləri, mütəşəkkil cinayətkarlıq fiqurlarını, siyasətçiləri və ya Dubaya mülkiyyət niyyəti ilə üz tutmuş başqa zəngin şəxsləri görmək olar.

AzadlıqRadiosu sözü gedən materiallarda Azərbaycan və azərbaycanlılar barədə olan hissələri diqqətinizə təqdim edir.

Çingiz Əsədullayev

Hesabatda deyilir ki, Çingiz Əsədullayev Azərbaycanın özəl maliyyə təsisatlarından olan 'Azəriqazbank'ın əsas səhmdarı və idarə heyətinin sədridir. O 2005-2010-cu illərdə ölkə parlamentinin deputatı olub.

Fərid Novruzi

Hesabatda adı nüfuzlu şəxs və ya tanınmış fiqur kimi keçir.

Qeyd olunur ki, o Azərbaycanda, Türkiyədə, Gürcüstanda, Birləşmiş Ərəb Əmirlikləri və Litvada brend geyimlər satan mağazaları işlədən Novco Group şirkətinin qurucusu və başçısıdır. Onun qardaşı Elsel Novruzi şirkətin vise-prezidentidir və ölkənin Gömrük Xidmətinin başçısı (artıq sabiq başçısı - AR) Aydın Əliyevin qızına evlidir.

Günel Novruzi

Aydın Əliyevin qızıdır və Novco Group şirkətinin vise-prezidenti Elsel Novruzinin həyat yoldaşıdır.

Rüfət Katibli

Rüfət Katibli Azərbaycanın dövlət neft-qaz şirkəti SOCAR-ın Marketinq və Satış departamentinin başçısıdır.

Arif Mir Cəlal oğlu Paşayev

Arif Mir Cəlal oğlu Paşayev Azərbaycanın vise-prezidenti və birinci ledisi Mehriban Əliyevanın atasıdır. O həm də millət vəkili və Milli Aviasiya Akademiyasının rəhbəridir.

AzadlıqRadiosunun nəzərdən keçirdiyi şirkət sənədlərindən Paşayevin də prezident Əliyevin qızları Leyla və Arzu ilə birlikdə Pasha Holding qrupunun əsas səhmdarı olduğu görünür. Pasha Holding Pasha bank, Pasha sığorta, Pasha tikinti və Pasha Travel kimi qurumların konqlomeratından ibarətdir.

Baba Rzayev

Baba Rzayev
Baba Rzayev

Baba Rzayev Azərişıq dövlət şirkətinin rəhbəridir. Rzayev və onun arvadı Nərmina Həsənova hakim Yeni Azərbaycan Partiyasının üzvləridir. OCCRP-nin müxbiri Xədicə İsmayılova onların ailə biznes bağları barədə 2012-ci ildə AzadlıqRadiosu üçün təhqiqat aparıb.

Xəyal Əlizadə

Xəyal Əlizadə hesabatda cinayətlə bağlı şəxs və ya şirkət kateqoriyası üzrə təsnif edilib.

O bir vaxtlar keçmiş prezident Heydər Əliyevin köməkçisi işləmiş Tariyel Ağayevin kürəkənidir.

Əlizadə Azərbaycanda Almaniya və Azərbaycan vətəndaşı Vüsal Schilder-in qətli ilə bağlı iş üzrə axtarışdadır. Schilder Xəyal Əlizadənin baldızı ilə görüşürdü.

Hesabatda deyilir ki, Əlizadə ona göndərilmiş email-ə cavab olaraq özünün daşınmaz əmlakı barədə şərh verməkdən imtina edib, lakin qətllə bağlı Azərbavcanda axtarışda olduğunu təsdiqləyib.

Baharxanım Talıbova

Baharxanım Talıbova Naxçıvan Ali Məcilsiinin sədri Vasif Talıbovun qızıdır. O de facto bu muxtar bölgənin avtoritar hakimi sayılır.

Talıbovanın adı həm də Azərbaycanın Pulyuyuan Maşını adlı araşdırmada çəkilir. Orada onun Metastar Invest LLP şirkətindəın 140 min dollar aldığı deyilir.

Mahmud Kamal oğlu Qubatov

Mahmud Kamal oğlu Qubatov Dövlət Standartlaşdırma, Metrologiya və Patent dövlət komitəsinin (artıq ləğv edilib - AR. ) direktorudur. O əvvəllər Bakının Qaradağ rayonunda icra hakimiyyəti başçısının müavini işləyib. Onun adı Cumeyra Parkda mülkiyyət satmış şəxs kimi keçir.

Nicat Heydərov

Nicat Heydərov Azərbaycan fövqəladə hallar naziri və Dövlət Gömrük Komitəsinin keçmiş başçısı Kəmaləddin Heydərovun oğludur.

ABŞ-ın açıqlanmış diplomatik teletayplarından birində Heydərovların Azərbaycanın ikinci ən qüdrətli ailəsi olduğu deyilirdi.

Tale Heydərov

Tale Heydarov
Tale Heydarov

Tale Heydərov da Kəmaləddin Heydərovun oğullarından birdir.

O Londonda mənzillənmiş Avropa Azərbaycan Cəmiyyətinin prezidentidir.

Seymur Talıbov

Seymur Talıbov Naxçıvan rəhbəri Vasif Talıbovun oğullarından biridir. O 2015-ci ildən muxtar respublika Məclisinin üzvüdür.

Arzu Əliyeva

Arzu Əliyeva Azərbaycan prezidenti İlham Əliyevin qızıdır.

Ona bağlı The Palm Marina malikanəsi daşınmaz əmlak reyestrində “qayıq körpüsü” kimi qeyd olunub.

Heydər Əliyev

İlham Əliyevin oğludur.

Əhməd Abdolbari Gözəl

Abdulbari Gözəl (sağda)
Abdulbari Gözəl (sağda)

Hesabatda Azərbaycanla bağlılığı olan iranlı Əhməd Abdolbari Gözəlin də adı çəkilir.

O 2013-cü ildə prezident İlham Əliyev və onun ailəsinin təmsilçisi olmuş Hassan Gözəlin qardaşıdır.

O habelə Əliyevin qızları Leyla və Arzunun adlarına qeydiyyatdan keçmiş üç ofşor şirkətinin direktoru olub.

Əslən iranlı olan qardaşların əsas biznesi Dubayın Cəbəl Əli azad ticarət zonasındadır.

Onlar Azərbaycanın dövlət neft şirkəti SOCAR-la milyardlarla dollarlıq tikinti kontraktları imzalayıblar.

Buna da bax:

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG