Bakıda Azərbaycanda terror aktları törətməyə hazırlaşdığı deyilən şəxslərin zərərsizləşdirildiyi bildirilir.
Bu barədə fevralın 1-i Dövlət Təhlükəsizliyi Xidmətinin (DTX) ictimai əlaqələr şöbəsindən açıqlama yayılıb.
Açıqlamaya görə, Azərbaycan hüdudlarından kənarda fəaliyyət göstərən terror təşkilatının tabeçiliyində olan bir qrup şəxsin partlayıcı maddələr və silah-sursat əldə edib, dini ekstremizm zəminində ölkə ərazisində terror aktları planlaşdırdıqları barədə DTX-ə məlumat daxil olub.
«Ağır cinayətlərin törədilməsinə hazırlıqda şübhəli bilinən Azərbaycan vətəndaşları – «Abu Hafsa» ləqəbli M.Ulubəyovun, «Abdulqərib» ləqəbli Q.Dəmirovun, «Əbdülxalid» ləqəbli F.Sadıqovun, T.Alməmmədovun və «Abdullah» ləqəbli S.Məmmədovun tutulmasından ötrü yanvarın 31-də xüsusi əməliyyat keçirilib. Əməliyyat zamanı qrup üzvlərindən M.Ulubəyov, T.Alməmmədov, Q.Dəmirov, S.Məmmədov silahlı müqavimət göstərərkən... məhv edilib. F.Sadıqov isə şübhəli şəxs qismində tutulub»,-deyə məlumatda qeyd edilir.
Bu açıqlamaya, hələlik, öldürülən və saxlanan şəxsin yaxınlarının münasibəti bəlli deyil. Əməliyyat görüntüləri də ictimaiyyətə yayılmayıb.
DTK bundan 4 gün əvvəl də dini ekstremizmdə şübhəli bilinən Ceyhun Ocaqovun öldürüldüyü ilə bağlı məlumat yaymışdı.