Yanvarın 2-də xidmət etdiyi sərhəd zastavasının üç hərbçisini güllələməkdə şübhəli bilinən Dövlət Sərhəd Xidmətinin Sərhəd Qoşunlarının müddətdən artıq hərbi qulluqçusu kiçik çavuş Elxan Əvəzli həbs olunub.

Baş Prokurorluqdan verilən məlumata görə, bu gün, yanvarın 4-də Cinayət Məcəlləsinin 120.2.7-ci (Qəsdən adam öldürmə, iki və daha çox şəxsi) maddəsi ittiham edilməklə, onun barəsində Füzuli Hərbi Məhkəməsinin qərarı ilə həbs-qətimkan tədbiri seçilib.

Rəsmi ittihama Elxan Əvəzli və onun yaxınlarından, hələlik, münasibət almaq mümkün olmayıb.

Əsgər saxlanıb

Qubadlıda üç hərbçi yoldaşını öldürüb qaçmaqda şübhəli sayılan şəxs saxlanıb.

Bu barədə Baş Prokurorluqdan məlumat verilib.

Rəsmi açıqlamaya görə, Sərhəd Qoşunlarının müddətdən artıq hərbi qulluqçusu kiçik çavuş Elxan Əvəzli yanvarın 2-də xidmət etdiyi sərhəd zastavasının hərbi qulluqçuları -baş leytenant Yusif İsmayılovu, kiçik gizir Amil Cəlilzadəni və kiçik gizir Rəfail İbrahimovu qəsdən öldürüb, silahını ataraq qaçmaqda şübhəli sayılır: "Həyata keçirilmiş əməliyyat-axtarış tədbirləri nəticəsində Elxan Əvəzli 03 yanvar 2022-ci il tarixdə saat 00:30 radələrində Laçın rayonunun Malxələf kəndi ərazisində aşkar olunaraq şübhəli şəxs qismində saxlanılıb".

Hazırda hadisənin təfərrüatlarının müəyyən edilməsi istiqamətində intensiv istintaq hərəkətlərinin davam etdiyi bildirilir.

Rəsmi açıqlamaya, hələlik, saxlanan əsgərin və ya onun yaxınlarının münasibətini almaq mümkün olmayıb.

Bir hərbçi üç hərbçini qətlə yetirib (Rəsmi)

Yanvarın 2-də Dövlət Sərhəd Xidməti, Sərhəd Qoşunlarının “Qubadlı” əlahiddə sərhəd diviziyasının xidməti ərazisində bir hərbi qulluqçunun 3 hərbçini qətlə yetirdiyi barədə məlumat yayıb.

Məlumatında iddia olunur ki, hadisəni Elxan Əvəzli adlı kiçik çavuş törədib.

"02 yanvar 2022-ci il tarixdə saat 18:00 radələrində Dövlət Sərhəd Xidmətinin Sərhəd Qoşunlarının “Qubadlı” əlahiddə sərhəd diviziyasının xidməti ərazisində müddətdən artıq həqiqi hərbi xidmət hərbi qulluqçusu kiçik çavuş Əvəzli Elxan Məhəmməd oğlu naməlum səbəbdən öz xidməti silahından atəş açmaqla xidmət etdiyi sərhəd zastavasının hərbi qulluqçuları baş leytenant İsmayılov Yusif İsmayıl oğlunu, kiçik gizir Cəlilzadə Amin Fuar oğlunu və kiçik gizir İbrahimov Rəfail Natiq oğlunu qətlə yetirmişdir. Bundan sonra baş çavuş E.Əvəzli silahını ataraq hadisə yerindən qaçmışdır".

Məlumatda qətl törətməkdə iddia olunan həmin hərbçinin axtarışı ilə bağlı tədbirlərin davam etdirildiyi vurğulanır.

Həmçinin qeyd olunur ki, Dövlət Sərhəd Xidməti və Baş Prokurorluğun əməkdaşları tərə­findən hadisə ilə bağlı müvafiq tədbirlər həyata keçirilir.

Buna da bax:

Prezident Qubadlıda

Hələki 3 hərbçinin qətlində ittiham olunan kiçik çavuş Elxan Əvəzlinin yaxınlarından bu hadisəyə münasibət öyrənmək mümkün olmayıb.

Buna da bax:

Şuşa Bəyannaməsi imzalandı (Videolar)

Rusiyada politoloq Aleksandr Kınev cinayət işi çərçivəsində həbs edilib və Moskvanın Perovo rayon Məhkəməsinin qərarı ilə sentyabrın 25-də istintaq təcridxanasına göndərilib.

"Mediazona"nın məhkəmə sənədlərinə istinadən yaydığı məlumata görə, Kınev narkotik vasitələrin qanunsuz dövriyyəsində ittiham olunur və bu maddə üzrə onu 10 ildən 20 ilədək həbs cəzası gözləyir.

Politoloqun saxlanılması faktını vəkil Mixail Biryukov da "Mediazona"ya təsdiqləsə də, onun məhz nə vaxt saxlanıldığı hələlik məlum deyil. İki gün əvvəl Kınev Dövlət Dumasına keçirilən seçkiləri "Facebook" hesabında şərh edib, həmçinin yaxın vaxtlara qədər onun Telegram-kanalında da seçki nəticələri ilə bağlı paylaşımlar dərc olunub.

Jurnalist Aleksey Venediktovun yazdığına görə, Kınev özünü təqsirli bilmir.

Kınev Rusiyanın regionlarında hakimiyyət strukturunu təhlil edir, seçkilərlə bağlı araşdırmalar aparır. Onun 2025-ci ildə işıq üzü görən "Rusiya regionlarını kim və necə idarə edir" kitabında SSRİ-nin dağılmasından sonra regional administrasiyaların formalaşması mərhələləri tədqiq olunur.

Politoloq Ukraynadakı müharibəyə qarşı çıxıb. Rusiya hakimiyyəti bu ilin fevralında onu "xarici agent" elan edib.

2026-cı ilin yanvar-avqust aylarında Azərbaycana dünyanın 191 ölkəsindən 1 milyon 586 min xarici və vətəndaşlığı olmayan şəxs gəlib.

Dövlət Statistika Komitəsinin (DSK) sentyabrın 25-də yaydığı məlumata görə, bu göstərici əvvəlki ilin müvafiq dövrü ilə müqayisədə 7.8 faiz azdır.

Gələnlərdən ən çox- 27.9 faizini Rusiya, 19.4 faizini Türkiyə, 7.8 faizini İran, 4.8 faizini isə Gürcüstan vətəndaşları təşkil edib.

Ötən ilin eyni dövrü ilə müqayisədə Avropa İttifaqına üzv ölkələrdən gələnlərin sayı 6.6 faiz artaraq 77.8 min, MDB ölkələrindən gələnlərin sayı isə 3.1 faiz artaraq 619.5 min nəfərə çatıb. Bunun əksinə olaraq, Körfəz ölkələrindən gələnlərin sayı 33.3 faiz azalaraq 192 min nəfərə düşüb.

Bu ilin səkkiz ayında ötən ilin analoji dövrü ilə müqayisədə xarici ölkələrə gedən Azərbaycan vətəndaşlarının ümumi sayı da 2.4 faiz azalaraq 1 milyon 384.5 min nəfər olub. Onların 43.9 faizi Türkiyəyə (ötən ilin eyni dövrünə nisbətən 2.2 faiz çox), 14.8 faizi Rusiya Federasiyasına (2.2 faiz az), 12.8 faizi Gürcüstana (13.6 faiz çox), 5.3 faizi isə İrana (41.2 faiz az) gedib.

Rəsmi statistika son illər həm Azərbaycana gələnlərin, həm də ölkədən xaricə gedənlərin sayında davamlı azalma meylinin olduğunu göstərir.

Xatırlatma

Ekspertlərin fikrincə, ölkəyə gələn xaricilərin sayının azalmasına iki əsas amil təsir edir: quru sərhədlərinin hələ də bağlı qalması və Azərbaycanda istirahətin qonşu ölkələrə nisbətən baha olması. Quru sərhədləri 2020-ci ildə koronavirus səbəbindən bağlansa da, hökumət təhlükəsizlik amillərini əsas gətirərək bu məhdudiyyəti hələ də qüvvədə saxlayır.

Körfəz ölkələrindən gələnlərin sayındakı azalma isə bu il Yaxın Şərqdə artan hərbi gərginliklə izah olunur.

Azərbaycan vətəndaşlarının xaricə səfərlərindəki geriləməni isə mütəxəssislər əhalinin maddi vəziyyəti ilə əlaqələndirirlər.

Bu gün – sentyabrın 25-də günorta saatlarında Rusiyanın Ukraynanın paytaxtı Kiyevə dron hücumu nəticəsində üç nəfər həlak olub. Bu barədə şəhərin meri Vitali Kliçko məlumat verib.

"İlkin məlumata görə, dronun düşdüyü ofis binasının yaxınlığındakı dayanacaqda avtomobillər alışıb. Orada üç nəfərin meyiti tapılıb. Daha yeddi nəfər isə yaralanıb”, –Kliçko Teleqram kanalında yazıb.

+++

Sentyabrın 25-nə keçən gecə Rusiya Ukraynaya dron və raketlərlə irimiqyaslı hücum edib. Kiyev şəhəri, Kiyev və Odessa vilayətləri hədəfə alınıb. Ölənlər var.

Kiyev meri Vitali Kliçkonun Telegram-da yazdığına görə, dronun çoxmərtəbəli yaşayış binasına çırpılması nəticəsində 7–10-cu mərtəbələrdə yanğın başlayıb. Digər bir dron isə 25 mərtəbəli başqa binanın dördüncü mərtəbəsinə dəyib.

Kiyevə hücum nəticəsində 14 yaşlı oğlan həlak olub, daha üç nəfər yaralanıb. Yaralılardan birinin vəziyyətinin ağır olduğu bildirilir.

Rusiya hərbçiləri Odessa şəhərinə və vilayətinə də növbəti zərbə endiriblər. Bir qadın həlak olub, daha bir nəfər isə yaralanıb.

Sentyabrın 25-i səhər saatlarında Rusiyanın Zaporojye şəhərini atəşə tutması nəticəsində tibb mərkəzində yanğın başlayıb, təcili tibbi yardım maşınları zədələnib, bir nəfər yaralanıb.

Rusiya Müdafiə Nazirliyi isə Kiyev vilayətində dron anbarını, Odessa vilayətində isə iki logistika mərkəzini və Reni limanını vurduğunu bildirib.

Ukrayna Hərbi Hava Qüvvələrinin məlumatına görə, Rusiya gecə hücumları zamanı 295 zərbə dronundan istifadə edib, onlardan 267-si vurulub. Bu rəqəmləri müstəqil mənbələrdən təsdiqləmək mümkün olmayıb.

Ukraynanın zərbələri

Ukrayna dronları isə ötən gecə Rusiyanın Perm diyarında, Voronej, Rostov və Ulyanovsk vilayətlərində sənaye müəssisələrinə genişmiqyaslı hücumlar təşkil edib. Xəsarət alanlar var.

Ulyanovsk vilayətinə hücum nəticəsində biri uşaq olmaqla, səkkiz nəfərin xəsarət aldığı açıqlanıb.

Rostov vilayətinin qubernatoru Yuri Slyusar region səmasında 50 dronun vurulduğunu bildirib. Onun sözlərinə görə, hücum nəticəsində Novoşaxtinsk Neft Məhsulları Zavoduna ziyan dəyib, müəssisə fəaliyyətini müvəqqəti olaraq dayandırıb. Xəsarət alan olmayıb.

Rusiya Müdafiə Nazirliyi ölkənin 18 regionu və Krım yarımadası üzərində Ukraynaya məxsus 600-ə yaxın dronun vurulduğunu bildirib. Ukrayna Silahlı Qüvvələrinin Baş Qərargahı zərbələri hələlik şərh etməyib.

Qazaxıstanda Xəzər dənizində hərbi təlimlər zamanı həlak olan hərbçilərin sayı 12-yə çatıb. Manğıstau vilayətinin regional hakimiyyət orqanlarının yaydığı məlumata görə, daha iki hərbçinin axtarışları davam edir və onlar hələ də itkin düşmüş hesab olunurlar.

Hadisə ötən gün baş verib, güclü dalğa 17 nəfəri dənizə aparıb. Onlardan 12-si ölüb, üçünü isə xilas etmək mümkün olub.

Prezident Kasım-Jomart Tokayev sentyabrın 25-də ölkədə ümummilli matəm günü elan edib.

"Azattyq Asia" yazır ki, bu, Xəzər dənizində təlim zamanı ilk ölüm halı deyil. 2015-ci ildə Aktau yaxınlığında keçirilən "Mərkəz – 2015" təlimlərində də dörd hərbçi həlak olmuşdu. Həmin vaxt göyərtəsində 52 hərbçi olan altı BTR-80 zirehli transportyoru dənizə çıxmış, güclü külək nəticəsində batmışdı. Faciənin səbəbləri kimi təhlükəsizlik qaydalarına riayət olunmaması, şəxsi heyətin hazırlığının yetərsizliyi və nəzarətin zəifliyi göstərilmişdi. Altı nəfər təqsirli bilinərək məsuliyyətə cəlb edilmişdi.

+++

Qazaxıstan Müdafiə Nazirliyi təlim zamanı 9 hərbçinin həlak olduğunu, qalanlarının isə axtarıldığını bildirib.

Məlumata görə, sentyabrın 24-də Manğıstau vilayətində Qazaxıstan Silahlı Qüvvələrinin Hərbi Dəniz Qüvvələri təlim keçirərkən hava şəraiti qəfil pisləşib və külək güclənib. Xəzər dənizinin sahilində təlim-döyüş tapşırığını yerinə yetirən hərbçilər güclü dalğanın təsirindən dənizdə batıb.

19 hərbçidən doqquzunun öldüyü təsdiqlənib, üç hərbçi xilas edilib. Onlardan biri xəstəxanaya yerləşdirilib. Qalan hərbçilərin axtarışı davam edir.

Faktla bağlı Qazaxıstan Baş Prokurorluğunda cinayət işi başlanıb.

Berlin-Brandenburq aeroportu yaxınlığında dron görünməsi səbəbindən sentyabrın 23-ü axşam saatlarında işini müvəqqəti dayandırıb.

Dron yerli vaxtla saat 20:00 radələrində görünüb. Bundan sonra Almaniyanın Hava Nəqliyyatının İdarə Edilməsi Xidməti (DFS) əvvəlcə şimal, sonra isə cənub uçuş-enmə zolağını bağlayıb. Məhdudiyyətlər bir saat sonra aradan qaldırılıb.

DPA agentliyinə görə, Berlin-Brandenburq Almaniya hava limanları arasında yaxınlığında ən çox dron aşkar edilən məkandır. Dispetçer xidməti 2026-cı ilin ilk altı ayında burada 28 dron qeydə alıb və onlardan 7-sində uçuşlar dayandırılıb. Müqayisə üçün, 2025-ci ilin bütün ili ərzində cəmi 8 dron qeydə alınmışdı.

Hazırda Almaniya aeroportları və hərbi obyektləri yaxınlığında şübhəli dronların görünməsi ilə bağlı bir neçə hadisə araşdırılır.

Avqustda Leypsiq hava limanında bir neçə dron tapılıb. Onlardan birinin partlayıcı ilə təchiz olunduğu və Ukraynanın sursat daşıyan "An-124" təyyarəsinin yaxınlığında yerləşdiyi bildirilir. Sentyabrın 1-də Almaniya hakimiyyəti iddia edilən təxribat cəhdində Rusiyanı günahlandırıb. Moskva ittihamları rədd edib.

Sentyabrın 23-də Vunstorf hərbi aerodromu yaxınlığında tapılan dron qalıqlarının yanında da naməlum maddə aşkarlanıb. Maddənin partlayıcı olduğu güman edilir, amma kriminalistik ekspertiza hələ bitməyib. Həmin aerodromda Almaniya Hərbi Hava Qüvvələrinin "Airbus A400M" hərbi nəqliyyat təyyarələri yerləşir.

Almaniyanın Federal Prokurorluğu və Federal Cinayət İşləri İdarəsi bu iki hadisə arasında əlaqəni araşdırır.

Almaniya mediasının məlumatına görə, dronların quruluşu oxşardır. Vunstorfdakı dronun ən azı bir detalı 3D printerdə hazırlanıb.

Sentyabrın 23-də Rusiyaya məxsus Mi-8 hərbi helikopteri Polşanın hava məkanını pozub. Polşa Silahlı Qüvvələrinin Operativ Komandanlığının məlumatına görə, hadisə ilə əlaqədar qırıcı təyyarələr havaya qaldırılıb.

Açıqlamada bildirilir ki, Kalininqrad istiqamətindən gələn helikopter Polşanın hava məkanına təxminən 300 metr daxil olub və orada 42 saniyə qalıb.

“Hadisənin xarakteri göstərir ki, Rusiya hava hücumundan müdafiəmizin hazırlığını yenidən sınağa çəkir”, – məlumatda deyilir.

Sentyabrın 13-nə keçən gecə Polşa-Ukrayna sərhədi yaxınlığında Rusiya dronlarının hücumlarından sonra Polşanın baş naziri Donald Tusk Rusiyanın gərginliyi artırmasının “artıq fakta çevrildiyini” bildirib. O xəbərdarlıq edib ki, qarşıdakı həftələr və aylar Moskvanın “çox intensiv fəaliyyət” dövrü ola bilər. Tuskun sözlərinə görə, gərginliyin Polşa ərazisinə də yayılacağını istisna etmək olmaz.

İyulun 30-na keçən gecə Rusiyanın X-101 qanadlı raketi Polşaya düşüb. Ölkə prokurorluğunun məlumatına görə, raket 2026-cı ilin ikinci rübündə Moskva vilayətindəki zavodlardan birində istehsal olunub.

Almaniyadan Azərbaycana readmissiya edildikdən sonra həbs olunan Samir Aşurovun saxlandığı 1 saylı Kürdəxanı Təcridxanasında döyüldüyü bildirilir.
Bu barədə onun yaxınları məlumat yayıb.

Yaxınlarının açıqlamasına görə, Samir Aşurov bunun səbəbini təcridxananın bir əməkdaşına adı ilə müraciət etməsini göstərib. Onların vurğulamasına görə, o, Samir Aşurova “Mənə müəllim deyə müraciət etməlisən” söyləyib.

Yaxınları əlavə edib ki, artıq sentyabrın 22-də baş vermiş hadisə ilə bağlı Penitensiar Xidmətin rəisinə, Ombudsman Aparatına, prokurorluğa şikayət ərizələri yazılıb.

Hələlik, bu iddialara sözgedən təcridxananın cavabdeh şəxslərindən və başqa rəsmi qurumlardan münasibət alamq mümkün olmayıb.

Amma Penitensiar Xidmətdən bir qayda olaraq cəzaçəçəkmə müəssisələri və təcridxanalarda saxlanan şəxslərə işgəncə verilməsi ilə bağlı iddiaları yalanlayırlar.

17.09.2026

Ali Məhkəmə də Samir Aşurovu vaxtından əvvəl azadlığa buraxmadı

Sentyabrın 17-də Ali Məhkəmədə Almaniyadan Azərbaycana readmissiya edildikdən sonra həbs olunan Samir Aşurovun kassasiya şikayətinə baxılıb.

Yaxınlarının yaydığı məlumata görə, şikayət Bakı Apellyasiya Məhkəməsinin S.Aşurovun vaxtından əvvəl azadlığa buraxılması barədə müraciətini təmin etməməsi ilə bağlı olub.

Ali Məhkəmənin hakimi Vidadi Cəfərov Bakı Apellyasiya Məhkəməsinin qərarını qüvvədə saxlayıb.

"Samirə verilən haqsız cəzanın 2/3 hissəsini çəkdikdən sonra vaxtından əvvəl azadlığa buraxılması üçün müraciət etmişdi. Amma Xəzər rayon Məhkəməsi bu müraciəti rədd edib, Apellyasiya Məhkəməsi isə həmin qərarı dəyişdirmədən qüvvədə saxlayıb", – onda S.Aşurovun xanımı Nuranə Aşurova demişdi.

Samir Aşurovun həbsi

2023-cü il martın 29-da Almaniyadan deportasiya olunan S.Aşurov bundan 20 gün sonra saxlanıb. O, Elşən Nəbiyev adlı şəxsə bıçaqla xəsarət yetirməkdə ittiham olunub. Aşurov əvvəlcə Cinayət Məcəlləsinin 126.2.4 (ümumi təhlükəli üsulla, xuliqanlıq niyyəti ilə qəsdən sağlamlığa ağır zərər vurma) maddəsi ilə həbsdə saxlanıb. Bir neçə ay sonra isə ona qarşı Cinayət Məcəlləsinin daha bir - 221.3-cü (silahdan və ya silah qismində istifadə olunan əşyalardan istifadə etməklə xuliqanlıq törətmək) maddəsi ilə ittiham irəli sürülüb. 2023-cü il dekabrın 18-də Bakı Ağır Cinayətlər Məhkəməsi onu təqsirli bilərək 6 il 6 ay azadlıqdan məhrum edib.

Hüquq müdafiəçiləri S.Aşurovu siyasi məhbus kimi tanıyıblar. O, ittihamı qurama sayır.

Amma rəsmilər ölkədə siyasi məhbusların olması ilə bağlı fikirləri qəbul etmirlər. Onlar deyirlər ki, siyasi məhbus siyahılarına daxil edilənlər sırf törətdikləri əmələ görə məsuliyyətə cəlb olunublar.

Xatırlatma

Son dörd il ərzində Avropa ölkələrindən (əsasən, Almaniyadan) Azərbaycana readmissiya edilən şəxslərdən ən azı beş nəfərin (S.Aşurov daxil) narkotik və başqa ittihamlarla həbsi diqqət çəkib. Onlar həbslərini mühacirətdə olarkən Azərbaycanla bağlı etiraz aksiyalarında fəallıqları ilə izah ediblər. Amma rəsmilər, bir qayda olaraq, insanların tənqidi mövqelərinə görə əsassız yerə təqib olunmaları ilə bağlı deyilənləri qəbul etmirlər.

Azərbaycandan ixrac olunan vintlər (boltlar və qaykalar) üçün gömrük rüsumu kəskin artırılıb.

Nazirlər Kabinetinin sentyabrın 22-də qəbul etdiyi yeni qərara əsasən, bu məhsulların hər 1000 kiloqramı üçün gömrük haqqı 15 dollardan 300 dollara qaldırılıb. Yeni qayda 2029-cu ilin sonuna qədər qüvvədə olacaq.

Qərar dərc olunduqdan 30 gün sonra qüvvəyə minir.

Hökumət bu addımın səbəbini rəsmi olaraq açıqlamayıb.

Son bir ildə Azərbaycanda bir çox sahələrdə rüsum və cərimələr artırılıb.

Həbsdə olan Azərbaycan Xalq Cəbhəsi Partiyası (AXCP) üzvü Razi Alışovun səhhətində ciddi problemlər yarandığı bildirilir.

Partiyadan ailəsinə istinadən yayılan məlumata görə, o, bir müddətdir hərəkət etməkdə çətinlik çəkir, son günlər isə ayaqları tamamilə tutulub: "O bildirib ki, yaxın vaxtlarda həkim müayinəsindən keçib və həkim onun belində yırtıq (qrija) olduğu qənaətinə gəlib. Amma diaqnozun təsdiqlənməsi üçün aparat müayinəsi və müalicə aparılmayıb, ona görə də durumu xeyli ağırlaşıb".

Hazırda onun hazırda 13 saylı Cəzaçəkmə Müəssisəsində saxlandığı bildirilir.

Bu açıqlamaya müəssisənin rəhbərliyindən və Penitensiar Xidmətdən münasibət almaq mümkün olmayıb.

Son vaxtlar həbsdə olan bir çox ictimai fəal və müxalifətçi tez-tez səhhətlərinin pisləşməsi, amma lazımı müayinə və müalicədən kənarda qalmaları ilə bağlı şikayətlər yayırlar. Penitensiar Xidmətdən isə, bir qayda olaraq, məhbuslara qanunvericiliyə uyğun şəkildə bütün, o cümlədən tibbi xidmətlərin göstərildiyi bildirilir.

Xatırlatma

AXCP üzvü R.Alışov 2022-ci ildə həbs olunub. Məhkəmə ona 5 il 6 ay həbs cəzası kəsib. R.Alışov satış məqsədilə narkotik əldə etməkdə günahlandırılır. O, ittihamını qəbul etmir.

Hazırda müxalifətdə olan AXCP-nin sədri də daxil olmaqla, hazırda 20-yə yaxın üzvü müxtəlif ittihamlarla həbsdədir. Partiya onların hamısının siyasi sifarişlə həbs olunduğunu bəyan edib.

Bəzi hüquq müdafiəçilərinin hazırladıqları siyahıya görə, hazırda Azərbaycanda 328 nəfər siyasi məhbus var.

Azərbaycan rəsmiləri isə ölkədə siyasi məhbus olması barədə deyilənləri qəbul etmirlər. Onlar vurğulayırlar ki, adları siyasi məhbus siyahısında yer alan şəxslər törətdikləri konkret cinayətə görə mühakimə ediliblər.

Ermənistan Xarici Kəşfiyyat Xidmətinin rəhbəri Kristine Qriqoryan IV Bakı Təhlükəsizlik Forumunda iştirak edir.

Bu barədə AzadlıqRadiosunun erməni xidmətinə baş nazir Nikol Paşinyanın mətbuat katibi Melanya Arutyunyan məlumat verib.

Sentyabrın 22-də qlobal təhlükəsizliklə bağlı IV Bakı Təhlükəsizlik Forumu başlayıb.

Ötən il Ermənistan Milli Təhlükəsizlik Xidmətinin MTX direktoru Andranik Simonyan 19-21 sentyabr tarixlərində Bakıda "3-cü Beynəlxalq Təhlükəsizlik Forumu"nda iştirak edib.

ABŞ Rusiya xarici işlər nazirinin müavini Aleksandr Alimova Nyu-Yorkda BMT tədbirlərində iştirak etmək üçün viza verməyib. TASS agentliyi xəbəri Rusiya Xarici İşlər Nazirliyinin Beynəlxalq Təşkilatlar Departamentinin direktoru Kirill Loqinova istinadla yayıb.

"Rusiya Federasiyasının BMT çərçivəsində keçirilən tədbirlərə göndərdiyi nümayəndələrlə bağlı bütün viza müraciətlərinin nə vaxtsa tam təmin olunduğunu xatırlamıram", – o deyib.

Rusiya prezidentinin mətbuat katibi Dmitri Peskov deyib ki, viza məsələsi ABŞ hakimiyyəti ilə müzakirə olunacaq. Onun sözlərinə görə, bu addım BMT-nin mənzil-qərargahına ev sahibliyi edən ölkənin öhdəliklərini pozur.

Sentyabrın 22-də Nyu-Yorkda BMT Baş Assambleyasının 81-ci sessiyası başlayır. Rusiya nümayəndə heyətinə xarici işlər naziri Sergey Lavrov rəhbərlik edir. Sentyabrın 23-də onun Nyu-Yorkda ABŞ dövlət katibi Marko Rubio ilə görüşü planlaşdırılır.

Sentyabrın 22-də Ukrayna prezidenti Volodimir Zelenski ilə ABŞ prezidenti Donald Trampın görüşəcəyi gözlənilir. Danışıqların əsas mövzusunun "enerji atəşkəsi" adlı razılaşmanın mümkünlüyü olacağı bildirilir.

Tramp son vaxtlar Ukraynanın Rusiyadakı neft emalı zavodlarına zərbələri məsələsinə dəfələrlə toxunub, bu hücumların dünya bazarında dizel yanacağının bahalaşmasına səbəb olduğunu bildirib. Zelenski bir gün əvvəl bəyan edib ki, Rusiya Ukraynanın mülki infrastrukturuna zərbələri dayandırarsa, Ukrayna da analoji deeskalasiya addımları atmağa hazırdır.

Sentyabrın 22-də Türkiyənin qərbindəki Manisa vilayətində bir şagird oxuduğu məktəbin qarşısında atəş açaraq azı səkkiz şagirdi yaralayıb. Bu barədə NTV telekanalı məlumat yayıb.

Məlumata görə, yaralılardan ikisinin vəziyyəti ağırdır. Yerli valilik hücum edən şəxsin saxlanıldığını bildirib.

İnternetdə yayılan foto və videolarda əli tüfəngli bir şəxsin məktəbin yaxınlığındakı küçə ilə getdiyi, daha sonra isə həmin küçədən geriyə qaçdığı görünür.

Hücumun motivi hələlik bəlli deyil.

Apreldə Türkiyə məktəblərində iki silahlı atışma insan itkisi ilə nəticələnib. Bundan sonra rəsmilər 2026-2027-ci tədris ili üçün yeni təhlükəsizlik tədbirləri tətbiq ediblər. Silahlara nəzarətin də sərtləşdirildiyi bildirilib.

Əvvəllər Türkiyədə bu cür hücumlar geniş yayılmamışdı.

Vitse-prezident Cövdət Yılmaz bildirib ki, daxili işlər naziri Mustafa Çiftçi və təhsil naziri Yusuf Tekin araşdırma aparmaq üçün Manisaya yollanıblar.

Ermənistanın baş naziri Nikol Paşinyan sentyabrın 22-dən 25-dək ABŞ-yə işgüzar səfərə yola düşüb. O, Nyu-Yorkda BMT Baş Assambleyasının 81-ci sessiyasında çıxış edəcək.

Hökumətin yaydığı məlumata görə, Paşinyan BMT-nin baş katibi Antonio Quterreş və digər xarici həmkarları ilə görüşlər keçirəcək. Digər görüşlərin konkret olaraq kimlərlə planlaşdırıldığı isə hələlik açıqlanmayıb.

Xarici işlər naziri Ararat Mirzoyan bir müddət əvvəl AzadlıqRadiosunun erməni xidmətinə BMT Baş Assambleyasının iclası çərçivəsində azərbaycanlı həmkarı, xarici işlər naziri Ceyhun Bayramovla görüşəcəyini, ancaq hələlik yekun razılaşma əldə olunmadığını bildirib. Mirzoyanın sözlərinə görə, bu görüş tərəflərin iş cədvəllərindən asılıdır.

Mirzoyan və Bayramov sonuncu dəfə sentyabrın əvvəlində Bişkekdə, Şanxay Əməkdaşlıq Təşkilatının (ŞƏT) sammiti çərçivəsində görüşüblər.

Ötən əsrin 80-ci illərində gərginləşən Qarabağ münaqişəsi Azərbaycan və Ermənistan arasında toqquşmalara səbəb olmuşdu. 1990-cı illərin əvvəllərində Azərbaycanın Qarabağ bölgəsi və ətrafındakı yeddi rayonu işğal edilmişdi. 2020-ci ildəki 44 günlük müharibə və 2023-cü ildə birgünlük hərbi əməliyyatlar nəticəsində Bakı bütün ərazilərində öz suverenliyini tam bərpa edib.

Ötən il avqustun 8-də Azərbaycan və Ermənistan rəsmiləri Vaşinqtonda sülh müqaviləsinin mətnini paraflayıblar. Oval ofisdə ABŞ prezidentinin iştirakı ilə tərəflər görüşün nəticələrinə dair birgə bəyannamə də imzaladılar. Bu bəyannaməyə əsasən, Ermənistanın cənubundan keçməklə Azərbaycanın əsas hissəsi ilə Naxçıvan arasında maneəsiz əlaqə təmin olunacaq. TRIPP (Beynəlxalq Sülh və Rifah naminə Tramp Marşrutu) adlanan bu tranzit xətti Ermənistanın suverenliyini, ərazi bütövlüyünü və yurisdiksiyasını tam qoruyub saxlayacaq.

Paraflanan mətndə tərəflər qarşılıqlı olaraq bir-birlərinin ərazi bütövlüyünü tanıyır, habelə qarşılıqlı iddiaların geri götürüləcəyini xüsusi vurğulayırlar.

Azərbaycan Nazirlər Kabineti dövlət məktəblərində şagirdlərin geyim formaları ilə bağlı qaydalara sentyabrın 21-də rəsmi dəyişikliklər edib.

Qərara əsasən, şagirdlərin məktəbli formasından fərqli və ya təhsilin dünyəvilik prinsipinə zidd olan geyimlərdən istifadə etməsi qadağandır.

Vurğulanır ki, Azərbaycan xalqının tarixi, mədəniyyəti və milli-mənəvi dəyərləri ilə bağlı tədbirlərdə şagirdlər milli geyim və ya onun elementlərindən istifadə edə bilərlər, amma bunun üçün məktəbin Pedaqoji Şurasının icazəsi mütləqdir.

Bildirilir ki, uşaqların məktəbə müəyyən olunmuş geyimdə gəlməsinə valideynlər məsuliyyət daşıyır.

"Bu sənədin tələblərinə təhsilalanlar tərəfindən riayət olunması ilə bağlı məsələləri məktəbin Pedaqoji Şurası həll edir", - qərarda yazılır.

Qərarda “dünyəvilik prinsipinə uyğun olmayan” geyim elementlərinin konkret olaraq nələri əhatə etdiyi açıqlanmır.Bir sıra təhlilçilər qərardakı “dünyəvilik prinsipinə uyğun olmayan" geyim elementləri ifadəsini hicab da aid edirlər.

4 il əvvəlki qərar və hicab şikayətləri

Azərbaycanda dövlət ümumi təhsil müəssisələrində vahid geyim forması Nazirlər Kabinetinin 17 mart 2022-ci il tarixli qərarı ilə təsdiq edilib və mərhələli şəkildə tətbiq olunmağa başlanılıb.

Məktəblərin daxili nizamnaməsi də bütün şagirdlərin dərsə vahid formada gəlməsini tələb edir. Amma tələblərdə hicabla bağlı hər hansı bir qeyd yox idi.

Bəzi ekspertlər bunu "bilərəkdən buraxılmış boşluq" kimi qiymətləndirirdilər.

Hər halda, istər 2022-ci il qərarından əvvəl, istərsə də sonra Azərbaycanda bir sıra valideynlər uşaqlarının məktəbə hicabla buraxılmamasından şikayət edirdilər. "Konstitusiyanın 42-ci maddəsinə əsasən, bizim təhsil haqqımız var. Amma dini inancımıza görə uşaqlarımız, övladlarımız məktəbə buraxılmır", - bu il Sumqayıtda yaşayan valideynlərdən biri AzadlıqRadiosuna bildirmişdi.

Hətta 2012-ci ildə Bakıda, Təhsil Nazirliyinin binası qarşısında hicabla bağlı icazəsiz aksiya keçirilmiş və polislə qarşıdurma yaranmışdı. Sonradan həmin hadisələrlə bağlı həbs edilənlər də oldu.

İndi bəzi ekspertlər hesab edirlər ki, qərara bu son dəyişikliklər sözügedən məsələ ilə bağlı hüquqi boşluğu aradan qaldıra bilər.

Naxçıvan Dövlət Universiteti Naxçıvan Müəllimlər İnstitutunun ona qoşulması yolu ilə yenidən təşkil ediləcək. Baş nazir Əli Əsədov bununla bağlı bu gün, sentyabrın 21-də müvafiq qərar imzalayıb.

Qərara əsasən, Naxçıvan Dövlət Universiteti Naxçıvan Müəllimlər İnstitutunun hüquqi varisidir. İnstitutun bütün hüquq və öhdəlikləri, habelə əmlakı Naxçıvan Dövlət Universitetinə keçir.

Hələlik qərara Naxçıvan Müəllimlər İnstitutunun rəhbərliyindən münasibət almaq mümkün olmayıb. Bəzi tələbələr isə bu addımı şərh etmək üçün hələ tez olduğunu bildiriblər.

Qərarda bunun səbəbi yalnız Naxçıvan Dövlət Universitetinin yenidən təşkili ilə izah edilib.

Naxçıvan Müəllimlər İnstitutu prezident Heydər Əliyevin 13 iyun 2000-ci il tarixli fərmanı ilə Azərbaycan Müəllimlər İnstitutunun Naxçıvan filialı kimi yaradılıb. Müəssisəyə müstəqil ali məktəb statusu isə Azərbaycan Respublikası Nazirlər Kabinetinin 26 avqust 2003-cü il tarixli qərarı ilə verilib.

Son illər Azərbaycanda doğum səviyyəsinin aşağı düşməsi səbəbindən şagirdlərin sayında da azalma müşahidə olunur. Bu proseslə paralel olaraq ölkədə orta məktəblərin, o cümlədən internat məktəblərinin sayı da azalmaqdadır. Mövcud tendensiya həm şagird sayının azalması, həm də dövlətin optimallaşdırma siyasəti ilə izah edilir. Bir sıra ekspertlər yaxın illərdə Azərbaycanda ali məktəblərin sayında da azalma baş verəcəyini ehtimal edirdilər.

Buna qədər Azərbaycanda dövlət və özəl ali məktəblərin sayı 51 olub.