Keçid linkləri

Təcili xəbərlər
2020, 30 Oktyabr, Cümə, Bakı vaxtı 20:19

Pompeonun Putin və Lavrovla Soçidə görüşəcəyi bildirilir


Mike Pompeo

ABŞ Dövlət Departamenti mayın 10-də bildirib ki, gələn həftə Rusiya prezidenti Vladimir Putinlə görüşmək üçün Moskvaya yollanacaq dövlət katibi Pompeonun danışıq gündəliyində silahlara nəzarət, Şimali Koreya, Ukrayna, Venesuela və Rusiyanın ABŞ seçkisinə müdaxiləsi məsələləri olacaq.

Bu, ABŞ və Rusiya rəsmiləri arasında 2018-ci ilin iyulundan bəri ən yüksək səviyyədə ilk görüş olmalıdır.

Dövlət Departamentinin bu məlumatından əvvəl Ağ Evin Putinlə Trump arasında daha bir görüş təşkil etməyə çalışdığı barədə şayiələr dolaşırdı.

İki prezident bundan bir həftə əvvəl telefonla danışıblar və həm Kreml, həm də Ağ Ev söhbətin yüksək səviyyədə keçdiyini bildiriblər.

Ağ Ev bildirib ki, iki lider xüsusi prokuror Robert Mueller-in bu yaxınlarda başa çatmış təhqiqatı məsələsini müzakirə edib.

Trump bu söhbət zamanı əvvəllər dəfələrlə olduğu kimi deyib ki, bu təhqiqat “Rusiya uydurması” idi. Lakin ABŞ kəşfiyyatının qiymətləndirməsi bunun tam əksini göstərir.

Moskva təsdiq edib ki, Pompeo Rusiyaya səfər edəcək, lakin dövlət katibinin bu səfərinin təfərrüatları barədə əlavə məlumat verilməyib.

ABŞ Dövlət Departamentinin yüksək vəzifəli rəsmilərindən biri mayın 10-da deyib ki, Pompeo mayın 13-də əvvəlcə Moskvaya səfər edəcək və burada ABŞ səfirliyinin heyəti ilə görüşəcək.

Onun habelə Rusiyadakı ABŞ biznes icması ilə görüşü də nəzərdə tutulub. Tanınmış investor Michael Calvey-in Moskvada hay-küylü həbsindən sonra bu icmanı narahat edən məsələlər var.

Adının çəkilməsini istəməyən rəsmi deyib ki, bundan sonra Pompeo mayın 14-də Putin və xarici işlər naziri Sergei Lavrovla görüşmək üçün Soçiyə yollanacaq.

Rəsmi deyib ki, “bizim Rusiyaya dair siyasətimizin başlanğıc nöqtəsi açıq desək, Rusiyanın qlobal səhnədəki bir sıra aqressiv və pozucu hərəkətlərinin Moskvaya xatırladılmasıdır”.

Rəsmi bunu da bildirib ki, Pompeonun səfərindən məqsəd bu mövqeyi bir daha xatırlatmaq və “Moskvadan gözləntilərin nə olduğunu Rusiya rəhbərliyinə çatdırmaqdır”.

XS
SM
MD
LG