Rusiya hakimiyyət orqanları bildirir ki, 1995-ci ildə Budyonnovsk şəhərində baş vermiş ölümcül girov böhranında iştirak etdiyi iddia olunan şəxs saxlanıb.
Rusiya Federal Təhlükəsizlik Xidmətinin (FTX) noyabrın 20-də verdiyi açıqlamada deyilir ki, 1978-ci il doğumlu Khazvakha Cherkhigov noyabrın 19-da Moskvada saxlanıb və Şimali Qafqaz regionuna etaplanıb.
Ötən iyun ayında Şimali Qafqaz Regional Hərbi Tribunalı Rostov şəhərində girovgötürmə əməliyyatında və terrorçu aktda iştirakda şübhəli bilinən başqa bir şəxsin - Badruddi Daudov-un aşkar edildiyini xəbər verirdi.
Təqsirli olduğunu inkar edən Daudov 14 il müddətinə azadlıqdan məhrum edilib.
1995-ci il, iyunun 14-də Shamil Basayevin başçılığı altında bir qrup çeçen separatçısı Budyonnovsk şəhərindəki polis idarəsinə və inzibati binalara hücum etmiş, 1500-dək adamı girov götürərək, Rusiya qoşunlarının Çeçenistandan çıxarılması tələbini qoymuşdu.
Bu hadisə zamanı 150-dək adam həlak olmuşdu. Sağ qalan girovlar 5 gün davam edən mühasirədən və ovaxtkı baş nazir Viktor Chernomyrdin Çeçenistanda atəşkəs vəd edəndən sonra azad edilmişdilər. Basayev və onun dəstəsinə Çeçenistana qayıtmaları üçün salamat keçid verilmişdi.
Bu böhranı başa çatdırmış razılaşma 1996-cı ilin avqustunda müharibəyə son qoyan sazişin imzalanması ilə nəticələnmişdi.
Çeçenistanda ikinci müharibə ovaxtkı baş nazir Vladimir Putinin qərarı ilə 1999-cı ildə başlanmışdı. Bundan əvvəl Basayev dəstəsi ilə birlikdə qonşu Dağıstana silahlı müdaxilə etmişdi.
O vaxtdan axtarışda olan Basayev 2006-cı ildə partlayışda həlak olub.
