Bu gün, noyabrın 3-ü Bank ombudsmanının inzibati ofisində vətəndaşla bank arasında mübahisəyə baxılıb.
Xəbəri Bank Ombudsmanlığı yayıb.
Mübahisə tərəfləri olaraq vətəndaş Abit Bağırovla «Muğanbank» ASC-nin təmsilçisi Sahib Daşdəmirov çıxış ediblər.
Tərəflər arasında mübahisəyə A.Bağırovun dollarla banka qalıq borcunun yaranması səbəb olub.
«Müzakirələrdən sonra bank vətəndaşın səhhətində olan problemləri, onun şəkərli diabet xəstəsi olmasını, 70 yaşında insult keçirməsini və həmçinin, sosial dolanışıq vəziyyətini nəzərə alaraq, qalıq borcdan imtina etməyə razı olduğunu bildirib».
Razılıq əldə olunduqdan sonra, Bank Ombudsmanlığının iştirakı ilə tərəflər arasında barışıq sazişi imzalanıb. Qalıq borcun məbləği açıqlanmayıb.
XATIRLATMA
Bank ombudsmanının yaradılması haqında qərar Azərbaycan Banklar Assosiasiyasının (ABA) bu il aprelin 14-də keçirilən ümumi yığıncağında verilib. Bu il sentyabrın 1-dən fəaliyyətə başlayıb.
Hazırda Bank Ombudsmanı 25 bank və 1 bank olmayan kredit təşkilatı üzrə daxil olan məsələlərə baxır. Bank Ombudsmanlığının ancaq 2 min dollar həcmində olan maliyyə mübahisələrinə dair qərar qəbul etmək səlahiyyəti var.
2015-ci ildə ölkədə iki devalvasiyasından sonra manat iki dəfə dəyər itirib. Bundan sonra kreditlərin ödənilməsində çətinliklər meydana çıxıb. Hazırda ölkədə problemli kreditlərin həcminin 1 milyard 800 milyon manatı keçdiyi bildirilir.
