Həbsxanadan prezidentə videomüraciət
Ağır Cinayətlərə dair İşlər üzrə Məhkəmənin hökmü ilə ömürlük azadlıqdan məhrum edilən Şəmkir rayon sakini Vüqar Əliyev həbsxanadan dövlət başçısı İlham Əliyevə video-müraciət göndərib.
Vüqar Əliyev müraciətində deyir ki, Şəmkir rayonunun sabiq icra başçısı Aslan Aslanovun göstərişi ilə törətmədiyi hadisəyə görə cəza çəkir. O, müraciətlərinə baxılmadığı üçün prezidentdən kömək istəyir:
«Aslan Aslanov yüksəkçinli məmur olduğu üçün yalançı şahidlərin vasitəsilə məni qeyri-qanuni olaraq ömürlük həbsə atdırıb. Cinayəti törətmədiyimi Lamiyə Quliyeva da təsdiq edir. İndiyənədək aidiyyəti orqanlara etdiyim müraciətlər cavabsız qalır. Ona görə də çox ümidlə sizə müraciət edirəm ki, həqiqəti ortalığa çıxarmaq üçün lazımı göstərişlər və tapşırıqlar verəsiniz».
"Eldar Mahmudovun həbsinə aparır..."
«Azadlıq» qəzeti yazır ki, keçmiş milli təhlükəsizlik naziri Eldar Mahmudovun həbsinə hazırlıq gedir:
««MTN işi» ilə bağlı istintaq Eldar Mahmudovun həbsinə aparır. «Azadlıq»a sızan məlumatlara görə, MTN-in keçmiş şefi hazırda tam təcrid olunmuş vəziyyətdədir. Onun bir kimsə ilə ünsiyyət qurmaq imkanı tanınmayıb. Hətta evindəki telefonlardan belə istifadə etmək hüququ yoxdur. Eldar Mahmudovun bu dərəcədə təcrid olunması onun hansısa bilgiləri ictimailəşdirə biləcəyi narahatlığından da irəli gələ bilər».
Rusiya təyyarəsi vurulub
CNNTürk xəbər verir ki, Suriya ilə Türkiyənin sərhəddini pozan qırıcı təyyarə vurulub. Məlumata görə, təyyarəni Türkiyə qırıcı təyyarələri vurub, ehtimala görə, vurulan Rusiya təyyarəsidir.
"Rusiyanın aviaqrupunun Su-24 qırıcı təyyarəsi Suriya ərazisində qəzaya uğrayıb. Ehtimala görə, o, yerdən atəşlə vurulub". Bunu isə Rusiyanın müdafiə nazirliyi bildirir. Nazirlik vurulan təyyarənin Suriya hüdudlarında vurulduğunu iddia edir.
Təyyarə 6 min metr yüksəklikdə vurulub. İki pilot paraşütlə atıla bilib.
CNNTürk xəbər verir ki, həmin pilotlar türkmanlar olan ərazidə əsir götürülüb.
Türkiyə: "Rusiya təyyarəsinə 10 dəfə xəbərdarlıq olunub"
Türkiyənin baş naziri Ahmet Davutoğlu Ordunun Baş Qərargah rəisi Hulusi Akar və xarici işlər naziri Firidun Sınırlıoğlu ilə Rusiya təyyarəsinin vurulması insidentini müzakirə edib. Reutersin məlumatına görə baş nazir göstəriş verib ki, NATO və BMT ilə məsləhətləşmələr aparılsın.
Türkiyə Ordusunun Baş Qərargahının məlumatına görə, Rusiya təyyarəsinə 10 dəfə xəbərdarlıq edilib, əhəmiyyət verilımədiyini görən Türkiyənin F-16 qırıcı təyyarəsi sərhəddi pozan Rusiya təyyarəsini vurub.
Rusiyanın müdafiə naziriliyi isə təyyraənin Suriya üzərində vurulduğunu bildirir və ehtimal edir ki, təyyarə yerdən vurulub.