“Azərkosmos” Açıq Səhimdar Cəmiyyəti (ASC), Ekologiya və Təbii Sərvətlər Nazirliyi ilə birgə Azersky peyki vasitəsilə Azərbaycanın işğal edilmiş ərazisində baş verən yanğınlarla bağlı monitorinq aparıb.
Bu barədə “Azərkosmos” ASC-nin bu gün, iyunun 30-da yaydığı məlumatda bildirilir.
Məlumatda vurğulanır ki, yanğınlar əsasən cəbhənin Ağdam rayonu istiqamətində törədilib.
“ İyunun 29-da Ağdam rayonunun işğal altından olan yaşayış məntəqələri üzrə ümimilikdə 280 hektar ərazinin yandığı aşkar edilib.
Hazırda monitorinqlər davam etdirilir”, məlumatda bildirilir.
Azersky Azərbaycan və Fransa arasında kosmik sənaye üzrə strateji əməkdaşlıq çərçivəsində 2014-cu ilin iyun ayında orbitə çıxarılıb. 2014-cu ilin dekabr ayında, Azərbaycanın milli peyk operatoru “Azərikosmos”ASC və Fransanın Airbus Defence and Space şirkəti arasında imzalanmış müqaviləyə əsasən birinciyə təhvil verilib.
Xatırlatma
1988-ci ildə baş verən Qarabağ münaqişəsi ilə bağlı Azərbaycan və Ermənistan arasında silahlı döyüşlər baş verib. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi, ona bitişik 7 rayon və bəzi əlavə kəndlər işğal edilib.
Dağlıq Qarabağ münaqişəsinin həlli ilə bağlı sülh danışıqları ATƏT-in Minsk qrupu həmsədrlərinin vasitəçiliyi ilə aparılır. ABŞ, Rusiya və Fransa həmsədr dövlətlərdir.
