Neft yenə ucuzlaşır
Çərşənbə günü – yanvarın 6-da «Brent» neftinin qiyməti bir neçə gündən bəri qalxdığı səviyyədən enməyə başlayıb, son 11 ilin ən aşağı həddi ətrafında var-gəl edib. Səbəb Yaxın Şərqdə iki əsas istehsalçı arasında gərginlikdir.
Səudiyyə Ərəbistanında şiə ruhaninin edamından sonra İranla gərginlik bu həftə neftin qiymətini elə də qaldıra bilmədi. Əksinə, OPEK üzvlərinin qiymət artımı naminə istehsalı azalda biləcəyinə dair spekulyasiyalara da son qoyuldu.
«Reuters» agentliyi xəbər verir ki, yanvarın 6-da GMT vaxtilə 06:13-də «Brent» markalı neftin barreli 36.45 dollara bərabərləşib. Ötən ilin dekabrında bu rəqəm 35.98 dollar, yəni son 11 ildə ən aşağı həddə idi.
Twitter işarə sayını artıra bilər
Twitter sosial şəbəkəsi işarə sayına qoyduğu məhdudiyyəti qaldırmağı düşünür. Bu, 300 milyondan çox istifadəçiyə daha geniş ifadə imkanı verəcək.
Texnologiya xəbərləri saytı olan Re/Code yanvarın 5-də yazıb ki, Twitter işarə sayının 140-dan 10 minə artırılmasını nəzərdən keçirir. On ildir bu sosial şəbəkədə 140 işarəlik limit mövcuddur.
Şirkət elə bir versiya üzərində işləyir ki, mesajda yalnız 140 işarə görünsün, ancaq tvitin üstünə basanda davamı çıxsın.
Türk Hava Yolları 84 uçuşu dayandırıb
«Türk Hava Yolları» (THY) «Atatürk» hava limanında gözlənilən fırtına səbəbindən Bakı-İstanbul reysini ləğv edib.
Şirkətin saytında verilən məlumata görə, bu il yanvarın 6-sı və 7-də nəzərdə tutulan 84 uçuş dayandırılıb.
Həmin reyslər arasında yanvarın 7-də İstanbul-Bakı (08.15 ) və Bakı-İstanbul (04.45-də ) uçuşları da var.
THY hava şəraitinin əlverişsizliyi səbəbi ilə dekabrın 31-i və yanvarın 1-də də bəzi reyslərini təxirə salmışdı
"Günə 6-7 manat qazananda sevinirəm"
35 yaşlı Rövşən Şirinov mərkəzdən kənar metroların çıxışlarında «şirin pambıq» və şar satır. Avropa Oyunları vaxtı işdən çıxarılandan sonra başqa iş tapmayınca, uşaqları ac qalmasın deyə, səyyar satıcılığa başlayıb. Deyir, 2-3 ay olar ki, bu işlə məşğuldur.
Rövşən «Azərsun Holdinq»də fəhlə işləyirmiş:
«300 manat maaş alırdım. Özüm çıxmaq istəməsəm də, ərizə yazdırıb çıxardılar. Bizlə bərabər türkiyəlilər, iranlılar da işləyirdi. Amma onlarla bizim maaşımız kəskin fərqlənirdi. Türkiyəlilər 7 min, iranlılar 4 min manata qədər maaş alırdı. Yenə də, yaxşı idi, belə soyuqda çöldə gəzmirdim, günortalar naharımızı verirdilər, isti yemək yeyirdik. O vaxtdan nə qədər iş axtarsam da, heç yerdə tapa bilmədim, məcbur qalıb səyyar satıcılıqla məşğul oldum».