Azərbaycanlılar Türkiyədə 11 ayda 158 şirkət qurub
Türkiyə Palatalar və Birjalar Birliyinin (TOBB) bu ölkədə yaradılan xarici sərmayəli şirkətlərin statistikasına dair açıqladığı ən son məlumata görə, 2015-ci ilin 11 ayında Azərbaycan vətəndaşları və şirkətləri Türkiyənin müxtəlif bölgələrində 158 şirkət qurulmasında iştirak ediblər.
Rusiyada yaşayan 86 min türk vətəndaşı
Rusiyada yaşayan 86 min Türkiyə vətəndaşının bir qismi Moskvanın qoyduğu embarqolar ucbatından Rusiyadan çıxır. Bəziləri isə hələ qalmağı düşünür.
Qayıtmaq qərarı verən 36 yaşlı Oğuz 8 il əvvəl Rusiyaya gedib. Deyir ki, hər şeyini yığıb Türkiyəyə gəlir: “Bir həftə içində iş üçün üç ayrı şəhərə gedəcəyəm. Artıq Rusiyada qalmağın bir mənası yoxdur”.
Oğuz indiyə qədər Rusiyada mağaza, otel idarəçiliyində işləyib: “Rusiyadakı iqtisadi böhranın bitməsini gözləyirdik ki, bu dəfə də təyyarə məsələsi çıxdı. Artıq burda qalmağın mənası yoxdur”.
Messi ilk dəfə ən yaxşı pleymeyker seçildi
Messi ilk dəfə dünyanın ən yaxşı pleymeykeri hesab olunub. Apasport.az saytının məlumatına görə, Beynəlxalq Futbol Tarixi və Statistikaları Federasiyası (İFFHS) 2015-ci ilin ən güclü oyun qurucularının siyahısını açıqlayıb.
Qurumun dünya ölkələrində olan nümayəndələri arasında keçirilən sorğunun nəticələrinə əsasən, Argentina yığmasının və “Barselona” klubunun üzvü, dünyanın ən yaxşı oyunçusu kimi 4 dəfə Qızıl Top alan Lionel Messi karyerasında ilk dəfə ən yaxşı pleymeyker mükafatına sahib olub. O, 168 xal toplayıb.
İkinci pillədə “Barselona”nın digər futbolçusu Andres İnyesta qərarlaşıb. O, 91 xal toplayıb. “Yuventus”un sabiq üzvü, hazırda “Nyu York Siti”nin formasını geyinən Andrea Pirlo isə 54 xalla 3-cü olub.
Siyahıda sonrakı yerləri Eden Azar (“Çelsi”, 22 xal) və Kevin Debruyne (“Volfsburq” və “Mançester Siti”, 22 xal), Yaya Ture (“Mançester Siti”, 13), Toni Kroos və Luka Modriç (hər ikisi “Real”, 11), Xames Rodriges (“Real”, 10) və Xavyer Pastore (PSJ, 10) tutublar.
Sorğuda Azərbaycanı apasport.az saytının əməkdaşı, İFFHS-in üzvü olan Vüqar Xeyrullayev təmsil edib.
Balakəndəki partlayışla bağlı cinayət işi açılıb
Yanvarın 4-də Balakəndə “Azəryem Sənaye” MMC-yə məxsus zavodun qazanxanasında baş verən partlayışla bağlı cinayət işi açılıb.
Cinayət işi Balakən rayon Prokurorluğunda Cinayət Məcəlləsinin 162.2-ci (əmək mühafizə qaydalarını pozma, ehtiyatsızlıqdan insan ölümünə səbəb olduqda) və 223.2-ci (partlayış təhlükəli obyektlərdə təhlükəsizlik qaydalarını pozma, ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddələri ilə başlanıb.
Partlayış nəticəsində 1 nəfər ölüb, 2 nəfər yaralanıb.