Azərbaycan ərazisində xüsusi karantin rejiminin müddəti dekabrın 28-dək uzadılıb. Bununla bağlı Nazirlər Kabineti yanında Operativ Qərargah məlumat yayıb.
Məlumatda qeyd edilib ki, hazırda dünyada yeni növ koronavirus (COVID-19) infeksiyasına yüksək yoluxma dinamikası müşahidə olunmaqdaqdır. "Bu səbəbdən virusun geniş yayılmasının qarşısının alınması üzrə müvafiq tədbirlər həyata keçirilir, bir çox ölkələr sərt karantin qaydaları tətbiq edir", - məlumatda yazılıb.
Qurum bildirir ki, Azərbaycanda virusun yayılmasının və onun törədə biləcəyi fəsadların qarşısının alınması məqsədilə ölkə ərazisində xüsusi karantin rejiminin müddəti bu il dekabrın 28-i saat 06:00-dək uzadılır. Sonucu dəfə bu müddət dekabrın 1-nə kimi uzadılmışdı.
Metro da dekabrın 28-nə kimi işləməyəcək
Üstəlik, aşağıdakı qadağaların tətbiq edilməsinə də qərar verilib:
- Sərt karantin rejimi tətbiq edilən Şəki, Lənkəran şəhərləri, Qax, Zaqatala, Biləsuvar, Cəlilabad, Masallı, İsmayıllı, Quba, Xaçmaz rayonlarında bu tədbirlərin müddəti 2020-ci il 7 dekabr saat 06:00-dək uzadılır;
- Bakı metropolitenində sərnişindaşımanın fəaliyyətinə tətbiq olunan məhdudiyyət 2020-ci il 28 dekabr saat 06:00-dək uzadılır;
Aptek və ərzaq mağazaları istisna olmaqla...
- 2020-ci il 21 noyabr saat 00:00-dan 28 dekabr saat 06:00-dək bütün ölkə ərazisində şənbə və bazar günləri ictimai nəqliyyatın fəaliyyəti dayandırılır;
- 2020-ci il 21 noyabr saat 00:00-dan 28 dekabr saat 06:00-dək şənbə və bazar günləri həyati əhəmiyyət kəsb edən fəaliyyət növləri, o cümlədən aptek və ərzaq mağazaları istisna olmaqla digər bütün sahələr üzrə yerində xidmətlər dayandırılır;
- 21 noyabr tarixindən etibarən xüsusi karantin rejiminin qüvvədə olduğu müddətdə ölkə üzrə bütün qapalı və açıq məkanlarda müvafiq qaydada tibbi maskalardan istifadə məcburi hesab olunur.
Buna əməl etməyənlər, qapalı məkanlarda olduğu kimi, açıq məkanlarda da cərimələnəcək.
65 yaşdan yuxarı olanlara tövsiyə
Dünyadakı, o cümlədən Azərbaycandakı mövcud sanitar-epidemioloji vəziyyəti nəzərə alaraq yüksək risk qrupuna daxil olan yaşı 65-dən yuxarı şəxslərin zərurət yaranmadan yaşayış yerlərini tərk etməmələri tövsiyə olunur.
Həmçinin, ...qurum və təşkilatlara da işçilərin say həddinin 30 faizədək azaldılması və digər əməkdaşların məsafədən iş rejiminə keçirilməsi tövsiyə edilir.
"Orduda kütləvi yoluxma yoxdur"
"Ayrı-ayrı hallar istisna olmaqla, Silahlı Qüvvələrimizdə yoluxma kütləvi formada baş verməyib".
Bunu bu gün, noyabrın 19-da Nazirlər Kabineti yanında Operativ Qərargahın təşkil etdiyi brifinqdə Azərbaycan prezidentinin köməkçisi Hikmət Hacıyev bildirib.
"Bizim yaralı əsgərlərimiz var və onların koronavirusa yoluxmasının qarşısının alınması da əsas vəzifələrdən biridir", - H.Hacıyev deyib.
Xatırlatma
Koronavirus pandemiyası ilə bağlı Azərbaycanda martın 24-dən karantin rejimidir. Karantin müddəti bir neçə dəfə uzadılıb. Bu vaxt ərzində rejim bir neçə dəfə həm sərtləşdirilib, həm də yumşaldılıb. Hazırda sərt karantin rejimi ölkənin müəyyən bir hissəsində tətbiq edilib.
2019-cu ilin sonlarında dünyada yeni koronavirus aşkar edilib. Bu il martın 11-də Dünya Səhiyyə Təşkilatı (DST) koronavirusu pandemiya elan edib. Dünyada sürətlə yayılan bu virusdan indiyə qədər 1 milyon 300 mindən çox şəxsin vəfat etdiyi açıqlanıb. Azərbaycanda isə indiyədək ümumilikdə 81397 nəfərin koronavirus infeksiyasına yoluxduğu, onlardan da 1030 nəfərin vəfat etdiyi açıqlanıb.
