Keçid linkləri

2024, 28 Mart, Cümə axşamı, Bakı vaxtı 13:14

AŞPA Monitorinq Komitəsi Azərbaycandakı vəziyyətlə bağlı açıqlama verib


Avropa Şurası Parlament Assambleyasının (AŞPA) Monitorinq Komitəsi Azərbaycandakı vəziyyətlə bağlı açıqlama yayıb.

Açıqlamada Azərbaycan hakimiyyətilə davam edən dialoq bəyənilib. Bunula belə bir sıra ləngimələr, məhkəmə sisteminin funksiyası və ifadə azadlığı ilə bağlı narahatlıqlar ifadə edilib.

Açıqlama Komitənin sentyabrın 7-də Parisdə başa çatan iclasından sonra yayılıb. AŞPA Monitorinq Komitəsində müzakirələrə sentyabrın 4-də başlanmışdı.

Komitə xüsusilə təəssüf edir ki, bir il öncə baş vermiş konstitusiya dəyişiklikləri icra hakimiyyətinin parlamentə daha az hesabat verməsinə imkan yaradır.

Eyni zamanda, parlamentarilər cinayət siyasətinin humanistləşdirilməsi ilə bağlı prezidentin sərəncamını bəyənərək hakimiyyəti bu islahatı reallaşdırmağa dəvət ediblər.

Açıqlamada vurğulanır ki, Azərbaycanla bağlı həmməruzəçilər Stefan Schennach (Avstriya) və Cezar Preda-nın (Rumıniya) məruzəsi qəbul olunub.

Komitə Azərbaycan hökumətinin 2012-2014-cü illərdə irimiqyaslı “pul yumaq” sxemində iştirakı və xüsusilə, bunun Azərbaycanda insan haqları ilə bağlı AŞPA əməkdşalarının işinə təsir etməsi kimi iddiaların narahatlıq doğurduğunu ifadə edib.

Azərbaycan hakimiyyətini bu hallarla bağlı təcili olaraq müstəqil və tərəfsiz təhqiqat aparmağa, bu məsələ üzrə səlahiyyətli beynəxlaq qurumlarla tam şəkildə əməkdşalığa səsləyiblər.

Komitə habelə, QHT lideləri, hüquq müdafiəçiləri, siyasi fəallar, jurnalistlər, bloqqer və vəkillərin təqib edilməsindən narahatlıq ifadə edib:

“2016-2017-ci illərdə bəzi məhbuslarının azad olunmalarını dəstəkləyirik. Amma saxlanmaları əsaslı şübhə doğuran məhbusları da azad etməyə səsləyirik”,açıqlamada vurğulanır.

Komitə həmçinin, parlamentdən kənar müxalifətin fəaliyyətinə və sərbəst toplaşma azadlığına məhdudlaşdırıcı mühit yaradılmasından da narahat olduğunu bildirib.

Qurum yekunda Azərbaycan hökumətini Avropa İnsan Hüquqları Məhkəməsinin qərarlarını tam şəkildə yerinə yetirməyi təmin etməyə, icra hakimiyyəti üzərində parlament nəzarətini gücləndirməyə, məhkəmə orqanlarının müstəqilliyini tam təmin etməyə səsləyib.

Bundan ötrü prokurorluq və məhkəmə sistemində islahatlar aparmaq təklif edilib.

Hökumət eyni zamanda, jurnalistlərin və QHT-lərin basqısız şəraitdə fəaliyyət göstərməsinə imkan tanımağa çağırıb.

Məruzənin AŞPA-nın payız sessiyasında müzakirəyə çıxarılması nəzərdə tutulur. AŞPA həmməruzəçiləri isə sentyabrın 13-dən 17-nə kimi bu sənədin müzakirəsindən ötrü Azərbaycana gəlməlidirlər.

AŞPA-dakı müzakirələrdən yenicə qayıdan Azərbaycan nümayəndə heyətinin rəhbəri Səməd Seyidov da məruzə və həmməruzəçilərin səfəri ilə bağlı Azadlıq Radiosuna qısa münasibətini bildirib:

“Bu məruzəni Azərbaycanda rəsmilərlə müzakirə etməyə, dialoq əsasında konstruktiv irəliləyiş görməyə gəlirlər. Biz də bunu faktiki qəbul edirik. Baxmayaraq ki, məruzə çox tənqidi məqamları ehtiva edir, biz deyirik: “Gəlin, bir də oturaq söhbət edək, görək harda düzdür, harda əyridir, nəyi düzəltmək mümkündür?” Biz konstruktiv dialoqdan əl çəkmirik. Baxmayaraq ki, sənəddə tənqid, hətta bəzi məqamda təhqir və təzyiq də əksini tapır” deyə Səməd Seyidov vurğulayıb.

Azərbaycan 2001-ci ildən Avropa Şurasının üzvüdür. Bu quruma üzv olarkən Azərbaycan insan haqları, azad seçkilər, Qarabağ münaqişəsinin sülh yolu ilə həlli və daha bir çox məsələlərlə bağlı üzərinə öhdəlik götürüb. Azərbaycan, hələ də qurumun monitorinqi altındadır.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG