Keçmiş İran prezidenti Mahmoud Ahmadinejad prezidentliyə namizədliyini qeydiyyatdan keçirib.
Bu barədə aprelin 12-də hurriyet.com saytı İranın İRNA agentliyinə istinadla xəbər yayıb.
İranda növbəti prezident seçkisi mayın 19-a təyin edilib.
Ahmedinejad bundan əvvəl prezidentlik uğrunda mübarizə aparmayacağını bəyan eləmişdi.
Amma namizədlərin qeydə alınmasına başlanmasının ertəsi günü keçmiş müavinləri ilə daxili işlər nazirliyinə gələrək ərizə verib.
Onu da qeyd edək ki, İranın ali dini lideri Ayatolla Ali Khamenei bir neçə ay əvvəl Ahmadinejada prezidentliyə namizədliyini verməməyi tövsiyə etmişdi və indi onun bu məsləhətə məhəl qoymaması media orqanlarının diqqətini çəkir.
Ahmadinejad həmin vaxt bunun əvəzində keçmiş müavini Bakayi-ni dəstəkləyəcəyini və siyasətdən uzaqlaşmayacaqlarını bəyan eləmişdi.
2005-2013-cü illərdə ölkə prezidenti olan Ahmadinejad bundan əvvəl indiki prezident Hasan Rohanini də Qərblə dialoqa görə tənqid edib.
O bunu, ölkənin milli maraqlarına zidd hesab edir.
Ntv.ru.novosti yazır ki, bundan başqa o, bu ilin fevralında açıq məktubunda immiqrasiya siyasəti və Vaşinqtonun Yaxın Şərqdəki hərəkətlərinə görə ABŞ prezidenti Donald Trump-ı da tənqid edib.
TASS-ın məlumatına görə indiyədək İranda prezidentliyə 200-ə yaxın adamın namizədliyi qeydə alınıb.
Mənbə yazır ki, bunu jurnalistlərə seçkilərin keçirilməsi ilə bağlı xüsusi qərərgahın rəhbəri Əli Əsgər Əhmədi (Ali Asghar Ahmadi) deyib.
Onun sözlərinə görə, aprelin 12-i yerli vaxtla saat 12:45-dək prezidentliyə 197 nəfərin namizədliyi qeydə alınıb.
Onlardan 8-i qadındır.