«Azərbaycan Dəmir Yolları» QSC-də struktur dəyişikliyi baş verib. Bakı şəhər yük stansiyası struktur bölməsi kimi ləğv edilib, onun istifadəsində olan əmlak isə «ADY Konteyner» MMC-yə ötürülüb.
«ADY Konteyner» MMC 50 min manatlıq nizamnamə kapitalı ilə bu ilin iyununda yaradılıb.
«Yeni şirkəti yaratmaqda məqsəd dəmiryolu ilə yük daşımalarında təhlükəsizliyi təmin etmək, yükdaşıma fəaliyyətini optimallaşdırmaq və konteyner daşımalarını mərkəzləşdirilmiş qaydada gerçəkləşdirməkdir». Bunu AzadlıqRadiosuna «Azərbaycan Dəmir Yolları» QSC-nin sözçüsü Sevinc Qədirova deyib.
Sentyabrın 8-də «ADY Konteyner» MMC-nin Beynəlxalq Transxəzər (yeni adı – «Middle corridor») Nəqliyyat Konsorsiumuna yeni üzv kimi daxil olması haqqında qərar qəbul edilib.
Bundan öncə ADY-nin İdarə Heyətinin sədri Cavid Qurbanovun əmrləri ilə bir neçə kommersiya qurumu, o cümlədən «ADY Ekspress» MMC və «ADY Əmlak» MMC yaradılmışdı.
