Keçid linkləri

Təcili xəbərlər
2018, 25 Fevral, bazar, Bakı vaxtı 07:47

Abbas Hüseynovun anası: ‘Neftin pulunu yeyiblər. Biz nə yemişik?’


“Ziyalılar Birliyi”nin ofisində tədbir

Avqustun 14-ü bir qrup ictimai fəal siyasi məhbus sayılan şəxslərin və dindarların vəziyyəti ilə bağlı “Ziyalılar Birliyi”nin ofisində tədbir keçiriblər.

Milli Şurasının Koordinasiya Mərkəzinin üzvü Eldəniz Quliyev deyib ki, son zamanlar həbsxanalardan gələn xəbərlər ciddi narahatlıq doğurur:

“Absurdun pik nöqtəsidir”.

“Son zamanlar hakimiyyətin müxalif düşüncəli insanlara, əsasən də inanclı kəsimə qarşı münasibəti yenidən sərtləşib.

Əvvəllər deyirdik ki, hakimiyyət qaşınmayan yerdən qan çıxarır. İndi isə, artıq, qan çıxan yeri qaşıyırlar. Qobustan qapalı həbsxanasında baş verən son olaylar da bunu göstərir”.

Buna da bax: Vəkil: 'Abbas Hüseynov çətinliklə yeriyir...'

O, vurğulayıb ki, ölkədə zorakılıq geniş meydan alıb:

“AXCP sədrinin müavini Gözəl Bayramlı hamının gözü qarşısında şərlənərək həbs edilib. Jurnalist Əfqan Muxtarlının başına torba keçirilərək Azərbaycana gətiriblər. Din xadimi Sərdar Babayev dini mərasim apardığına görə, həbs edilib. Absurdun pik nöqtəsidir”.

E.Quliyev Qobustan qapalı həbsxanasında “Nardaran məhbusları”nın vəziyyətindən də danışıb. O deyib ki, “Müsəlman Birliyi” Hərəkatının sədri Taleh Bağırovun “kars”a salınması, onun müavini Abbas Hüseynovun “çarmıxa bağlanması” kimi şikayətlər eşidilir.

Abbas Hüseynovun anası Rəhimə Hüseynova deyib ki, bir çox məsələləri yaxınları ondan gizlədiblər:

“Qara çörəklə uşaq böyütmüşəm”.

“Məndən gizlədirdilər, sən demə Abbası orda döyüb incidiblər. İsa peyğəmbəri kimi “çarmıxa bağlayıblar”, günün altında işgəncə veriblər. Bu işgəncələri bizə niyə verirlər? Nə torpaqları satıblar, nə də dövlətin əmlakını yeyiblər. Dövlətin malını, neftin pulunu yeyiblər. Biz nə yemişik? Qara çörəklə mən uşaq böyütmüşəm”.

Buna da bax: Polis dindarların aksiyasına mane olub

Həbsdə olan Azərbaycan Xalq Cəbhəsi Partiyası sədrinin müavini Fuad Qəhrəmanlının xanımı Zümrüd Yağmur da deyib ki, hətta ailəsi A. Hüseynovun öldüyünü güman edib. Yas mərasiminə hazırlaşıblar:

“Mən buradan İlham Əliyevə müraciət edirəm. O gedib xaricidə deyir ki, Azərbaycanda bütün azadlıqlar qorunur. Bəs bu barədə nə deyə bilər?”.

Keçmiş deputat, Milli Şuranın Koordinasiya Mərkəzinin üzvü İbrahim İbrahimli isə bildirib ki, təzyiqlər heç də səbəbsiz deyil. O, vurğulayıb ki, hakimiyyət həmişə dindarlardan istifadə edib:

“Həmişə Qərbə çatdırmaq istəyiblər ki, burada radikal İslam var. Sərt olmasa ekstremistlər, İrana işləyən qüvvələr hakimiyyətə gələcək. “Müsəlman Birliyi” Hərəkatı, Taleh Bağırov isə Milli Şura ilə bir yerdədir. Demokratik qüvvələri müdafiə edirlər. Ona görə də Milli Şuraya, Taleh Bağırova və onun tərafdarlarına təzyiqlər edirlər”.

“Hakimiyyət inanclı insanları sındırmaq istəyir”

“Xural” qəzetinin redaktoru Əvəz Zeynallı isə deyib ki, hakimiyyət ona problem yaradan qüvvələri sındırıb, indi də ondan narazı olan inanclı kəsimi sındırmağa cəhd edir. Əvəz Zeynallının deməsinə görə, bu heç də asan məsələ deyil.

Buna da bax: Nardaran məhbusu Qobustan həbsxanasını məhkəməyə verdi

Avqustun 8-də “Nardaran işi” üzrə vəkillərdən Yalçın İmanov Qobustan Qapalı Həbsxanasında A.Hüseynovla görüşüb. Görüşdə A.Hüseynov vəkilinə deyib ki, əsasız yerə ardıcıl “kars”a salınıb. Ona davamlı işgəncələr verilib. Hətta məhbus vurğulayıb ki, onu “çarmıxa” bağlayıblar.

A.Hüseynovun konkret işgəncə şikayətinə, hələlik, Qobustan qapalı həbsxanasının rəisindən və Penitensiar Xidmətdən münasibət almaq mümkün olmayıb. Ancaq qurumun mətbuat xidmətindən «Turan» agentliyinə bildiriblər ki, avqustun 8-də T.Bağırovun işgəncəyə məruz qalması ilə bağlı iddialara verdikləri cavab bu məsələyə də aydınlıq gətirə bilər.

Həmin açıqlamada qeyd edilirdi ki, T.Bağırovun işgəncəyə və qeyri-insani rəftara məruz qalması ilə bağlı deyilənlərin heç bir əsası yoxdur:

«Respublikada sabitliyi pozmağa, ictimaiyyət daxilində çaxnaşma yaratmağa cəhd edən qüvvələr ayrı-ayrı məhkumlar ətrafında ajiotaj yaradırlar. Bəzi kütləvi informasiya vasitələrində cəzaçəkmə müəssisələri barədə qeyri-sabitliyi əks etdirən qızışdırıcı və təhrikedici, uydurma məlumatlar dərc etməklə həmin məhkumların gündəmdə saxlanılmasına səy göstərirlər».

Buna da bax: Taleh Bağırov: 'Yaxşıyam, narahatçılığa ehtiyac yoxdur'

XATIRLATMA

2015-ci il noyabrın 26-da Baş Mütəşəkkil Cinayətkarlıqla Mübarizə İdarəsinin Bakının Nardaran qəsəbəsində keçirdiyi əməliyyatda ikisi polis olmaqla, 6 nəfər həlak olub. Rəsmi ittihama görə, radikal silahlı dəstə polis əməkdaşlarına silahlı müqavimət göstərib və ölənlər bu qarşıdurmada həyatlarını itiriblər.

Nardaranda və Sabunçu Rayon Polis İdarəsinin qarşısında baş verən hadisələrə görə 70-dən çox (hüquq müdafiəçilərinin siyahısında bu rəqəm 80-dən çox göstərilir) adam həbs olunub. Onların bir qisminə silah saxlama ittihamı ilə ilyarımdan 6 il 6 ayadək həbs cəzası kəsilib. 40 nəfərdən çox adama isə daha ağır maddələrlə (dövlət çevrilişinə cəhd, terrorçuluq, dini nifaq salma və s.) ittihamlar verilib.

Üç qrupa ayrılan cinayət işi Bakı Ağır Cinayətlər Məhkəməsinə göndərilib. «Müsəlman Birliyi» Hərəkatının sədri T.Bağırov və daha 17 nəfərin məhkəməsi yekunlaşıb. T.Bağırov, Abbas Hüseynova 20 il, digərlərinə isə 10 ildən 19 ilədək həbs cəzası verilib.

Daha iki qrupun məhkəməsi davam edir. Bu yaxınlarda isə əlavə iki nəfərin istintaqı yekunlaşıb. İş məhkəməyə göndərilib.

Nardaran olayları ilə bağlı həbs edilənlərin əksəriyyəti məhkəmələrində tutularkən və ilkin dindirilmədə ağır işgəncələrə məruz qaldıqlarını bildiriblər. Onlar verilən ittihamları qəbul etməyiblər.

Ancaq Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin və digər hüquq-mühafizə orqanlarının əməkdaşları məhkəmə prosesində işgəncə şikayətlərini təkzib ediblər.

Sənin fikrin

Şərhləri göstər

Günün bütün mövzuları

XS
SM
MD
LG