Son üç ayda Birləşmiş Ştatlara və Avropa İttifaqına müsbət yanaşan rusiyalıların sayı müvafiq olaraq 11 və 12 faiz artıb.
AzadlıqRadiosunun Rus xidməti Moskvadakı Levada ictimai rəyi öyrənmə mərkəzinə istinadən yazır ki, bu sorğu avqust ayının sonlarında Rusiya Federasiyasının 50 subyektinin 137 yaşayış məntəqəsində keçirilib.
Əgər may ayında ABŞ-a rəyi soruşulanların 27 faizi rəğbətli idisə, indi bu rəqəm 38-dir.
May ayında respondentlərin 33 faizi Avropa İttifaqına yaxşı baxdığını bildirmişdi, indi bu rəqəm 45 faizə çatıb.
Bu da qeyd olunur ki, Avropaya yaxşı münasibət bəsləyən rusiyalıların sayı Moskvaya qarşı Krımın ilhaqına və Ukraynanın şərqindəki təcavüzə görə sanksiyalar qoyulandan bəri ən yüksək həddinə çatıb.
Bununla belə rəyi soruşulanların 55 faizi Rusiyanı Avropa ölkəsi hesab etmədiyini deyib.
On il əvvəl belə düşünənlərin sayı iki dəfə az idi.
Eyni sorğu göstərib ki, Almaniyaya “əsasən mənfi” münasibət bəsləyənlər çoxalıb.
Almaniyaya mənfi münasibət bildirənlər 18 faiz təşkil edib.
Bu, Levada mərkəzinin sorğu keçirməyə başladığı vaxtdan ən yüksək göstəricidir.
