ABŞ-ın Moskvadakı səfiri Jon Huntsman-ın vəzifəsindən istefa edərək Birləşmiş Ştatlara qayıdacağı xəbər verilir.
Bu barədə məlumatı ABŞ mediası səfirin prezident Donald Trump-a məktubuna istinadən verib.
ABŞ-ın bir sıra media qurumları avqustun 6-da Huntsman-ın məktubunu dərc ediblər.
Bu da xəbər verilir ki, istefa oktyabrın 3-dən qüvvəyə minəcək. Bu müddət ərzində Vaşinqton onun əvəzinə müvafiq diplomat təyin etməlidir.
ABŞ Dövlət Departamenti bu barədə AzadlıqRadiosunun sorğusuna hələki cavab verməyib.
Bundan əvvəl Çində səfir olmuş və ABŞ prezidentliyinə namizəd kimi uğursuz cəhd etmiş Huntsman məktubunda yazır ki, Rusiyanı, Birləşmiş Ştatları və onun müttəfiqlərini hədələyən hərəkətlərinə görə “məsul tutulmalıdır”.
Huntsman ABŞ-ın Rusyadakı səfiri vəzifəsinə Trump tərəfindən 2017-ci ilin iyulunda təyin edilmişdi.
Növbəti ay onun namizədliyi Senatda yekdilliklə təsdiq olunmuşdu.
Huntsman-ın təyinatı Rusiya ilə ABŞ arasında münasibətlərin son dərəcə mürəkkəb vaxtına təsadüf edirdi.
Həmin dövrdə prezident Trump Rusiya prezidenti Vladmir Putinə heyranlığını açıq ifadə edir və Moskva ilə daha yaxşı münasibətlər istədiyini bildirirdi.
Buna baxmayaraq ABŞ-ın kəşfiyyat agentlikləri Rusiyanın 2016-cı il ABŞ prezident seçkisinə müdaxilə etdiyinə dair yekdil rəyə gəlmişdi.
Bu dövrdə habelə Vaşinqton Rusiya üzərinə yeni sanksiyalar elan edib.
