Qusarın Düztahir kəndində torpaq sürüşməsi təhlükəsi yaranıb. Düztahir kənd sakini Etibar Qasımov «Azadlıq» radiosuna deyib ki, sürüşmə təhlükəsi iyulun 8-i güclü yağan yağışdan sonra yaranıb:
«Bir əlli hektar ərazi sürüşmə təhlükəsindədir».
Qusar Rayon İcra Hakimiyyəti başçısının müavini Elman Mustafayev isə «Azadlıq» radiosuna deyib ki, Düztahir kəndindən belə bir təhlükə haqqında xəbər daxil olsa da, orada ciddi fakt müşahidə olunmayıb.
E.Mustafayev bildirib ki, daha ciddi təhlükə Qənərçay kəndində müşahidə olunur:
«Altı nəfərdən ibarət komissiya iki gün ərzində orda işləyib. Dəymiş zərər haqqında məlumatlar toplanıb, indi dəqiqləşdirmələr aparılır və yekun nəticə haqqında məlumat veriləcək».
ANS PRESSin məlumatına əsasən isə, Düztahir kəndindəki Uqur çayının keçdiyi təxminən 10 hektarlıq ərazidə iri çatlar əmələ gəlib. Hadisə yerinə Fövqəladə Hallar Nazirliyinin və yerli icra oqanlarının nümayəndələri gəlib.
Ötən həftə yağan yağışlar nəticəsində Qusarın Qənərçay kəndində torpaq sürüşməsi olub. 6 ev dağılıb, 20-dən çox ev isə qəza vəziyyətinə düşüb.
