BMT-nin Ümumdünya Ərzaq Proqramı (ÜƏP) iyunun 30-dan Azərbaycanda fəaliyyətini dayandırır. Təşkilat Azərbaycanda fəaliyyət göstərdiyi 15 il ərzində məcburi köçkünlərə 115 mln. dollar dəyərində müxtəlif çeşiddə 165 min ton ərzaq paylayıb.
Təşkilat Azərbaycanda yeni fəaliyyətə başladığı dövrlərdə - 1995-1996-cı illərdə ölkədə 450 min köçkünə yardım göstərirdisə, ötən il bu rəqəm 70 minə enib. ÜƏP Azərbaycanda fəaliyyətini dayandırdığından ölkə hökuməti həmin köçkünləri himayəsinə götürür.
ÜƏP adambaşına 4 çeşiddə ərzaq yardımı - 12 kq un, 1,2 kq bitki yağı, 900 qram şəkər tozu, 300 qram yodlaşdırılmış duz paylayıb. Təşkilat buna il ərzində orta hesabla 7 milyon dollar vəsait xərcləyir.
ÜƏP-in Azərbaycanda fəaliyyəti ölkə hökumətinin xahişi ilə üç dəfə uzadılıb.APA
