ATƏT istəyir ki, Azərbaycanda əsas funksiyası insan alverinin vəziyyətilə bağlı məruzələr hazırlamaq olan xüsusi struktur yaradılsın.
Bunu ATƏT-in insan alverinə qarşı mübarizə üzrə xüsusi nümayəndəsi Yeva Biaudet bildirib. O, deyib ki, belə struktur çox ölkələrdə var.
Biaudet Bakıya iyunun 15-də gəlib. Onun məqsədi Azərbaycana ATƏT qarşısındakı öhdəliklərini xatırlatmaq və bu öhdəliklərin necə yerinə yetirildiyini izləməkdir.
ATƏT-in Bakı Ofisinin demokratikləşmə şöbəsinin əməkdaşı Məryəm Hacıismayılova «Azadlıq» radiosuna deyib ki, xüsusi nümayəndə insan alveri ilə mübarizə sahəsində məhsul şəxslərlə görüşəcək və problemlərlə bağlı tövsiyəsini verəcək:
«Yeva Biaudet 56 ölkədə məlumat toplayır. O, Azərbaycan tərəfini trafikinq sahəsində mövcud çətinliklərlə bağlı digər ölkələrin təcrübəsi ilə məlumatlandıra bilər».
ATƏT nümayəndəsinin səfəri iyunun 20-dək davam edəcək. Bu müddətdə o, Milli Məclis, Daxili İşlər və Ədliyyə nazirlikləri, Prokurorluq orqanlarında danışıqlar aparacaq, yerli QHT-lərlə görüşəcək.
