«Aqil Xəlilə qarşı aparılan kampaniyanı əxlaqa zidd hesab edirəm. Siyasi mübarizənin yol verilən metodikası və üsulları olmalıdır. Əgər hakimiyyət bu cür çirkin üsullardan istifadə edib kimisə hörmətdən salmaq istəyirsə, ilk növbədə bunun zərbəsi onun özünə dəyir». «Azadlıq» qəzetinə müsahibəsində Vətəndaş və İnkişaf Partiyasının sədri Əli Əliyev belə deyib.
O, bildirib ki, «hakimiyyətə alternativ fikir mərkəzi gərək deyil. Mətbuata bu cür təzyiqlərin olması hakimiyyətin öz cəmiyyətindən, öz vətəndaşlarından xoflandığının göstəricisidir. Hakimiyyət bütün baryerləri keçmək iqtidarında olduğunu nümayiş etdirmək istəyir. Amma əslində alternativ söz mərkəzi olarsa, qısa müddət ərzində, əvvəllər olduğu kimi yenə də müxalifət onların gətirdikləri arqumentləri alt-üst edəcək. Hakimiyyət bundan təşvişə düşərək bütün istiqamətlərdə hücuma keçib. Yalnız özünə arxayın olmayan siyasi qüvvələr zora əl atır və zorakı üsullarla rəqiblərini əzib güclü görünməyə nail olmaq istəyir».
Prezident İlham Əliyevin 2008-ci ilin birinci rübünün yekunlarına həsr olunmuş iclası dövlət qəzetlərinin hamısının diqqət mərkəzində olub.
«Respublika» qəzeti prezidentin 2008-ci ilin Azərbaycan iqtisadiyyatı üçün uğurlu il olacağını söylədiyini yazır. Dövlət başçısı bildirib ki, Azərbaycanın valyuta ehtiyatları 9 milyard dollar həcmindədir. «Ölkəmizdə uğurlu neft strategiyasının icrası nəticəsində bu il böyük artım gözlənilir. Bu, bizə əlavə güc və əlavə əminlik verir. Bu, bizə imkan verir ki, ölkəmizin müstəqil siyasətini daha da inamla irəliyə aparaq və Azərbaycan xalqının milli maraqlarını müdafiə edək».
Bununla belə ekspert hesab edir ki, parlament çirkli pulların yuyulması ilə əlaqədar qanun qəbul etməlidir: «Bütün bunlar korrupsiya qarşı mübarizə siyasətinin tərkib hissəsidir. Dolayısı yolla həmin prosesləri tənzimləyən qanunvericilik aktları mövcuddur. Amma bu kifayət deyil. Dünyada bu təcrübə geniş yayılıb. Belə pullar başqa ölkələrdən keçirilir. Yaxşı olar ki, qanun qəbul etməzdən öncə Azərbaycan bu sahəni tənzimləyən beynəlxalq konvensiyaya qoşulsun».