APA İnformasiya Agentliyi erməni silahlı qüvvələrinin Ağdam rayonu istiqamətində atəşkəsi yenidən pozması barədə məlumat yayıb. Həmin xəbərə görə, martın 8-də təmas xəttinin yaxınlığında yerləşən Əfətli kəndinin dinc sakinlərindən ikisi öldürülüb, daha ikisi isə yaralanıb.
ANSPRESS Agentliyi də yazır ki, martın 8-i axşam saat 19.00-da Əfətli kənd sakini Niyaməddin İsmayılov işğal altında olan Yusifcanlı kəndindən açılan atəş nəticəsində həlak olub. Hadisə yerinə yaxınlaşmaq istəyən N.İsmayılovun dayısı Etibar Mikayılov da öldürülüb. N.İsmayılovun atası və əmisi isə yaralanıb. Yaralılar xəstəxanaya yerləşdirilib. Onlardan birinin vəziyyətin ağır olduğu deyilir.
Bərdə Rayon Mərkəzi Xəstəxanasından «Azadlıq» radiosuna verilən məlumata görə, martın 9-u səhər onlara erməni gülləsindən yaralanan bir nəfər gətirilib. Qolundan yaralanan həmin şəxsin vəziyyəti hazırda yaxşıdır.
Azərbaycan Respublikası Müdafiə Nazirliyindən hadisə ilə bağlı məlumat almaq mümkün olmayıb.
Ötən həftə atəşkəsin pozulması nəticəsində həm Ermənistan, həm də Azərbaycan tərəfdən ölən və yaralananlar olub.
