«Cəbhədə vəziyyət getdikcə gərginləşir. İntensiv şəkildə atəşkəsin ermənilər tərəfindən pozulması hər iki tərəfdən itkilərə şərait yaradır».
Martın 5-də Müdafiə naziri Səfər Əbiyev NATO Parlament Assambleyasının prezidenti Coze Lello ilə görüşündə belə deyib.
Müdafiə Nazirliyinin Mətbuat Xidmətinin yaydığı məlumata görə, Əbiyev deyib ki, beynəlxalq təşkilatlar, o cümlədən NATO Parlament Assambleyası öz imkanlarından istifadə edərək münaqişənin həll edilməsi istiqamətində səylərini artırmalıdır: «Əks təqdirdə vəziyyət daha kəskin həddə çata bilər, Azərbaycan işğal altında olan torpaqlarının azad edilməsi üçün daha sərt üsullardan istifadə edər».