«Amerika çalışacaq ki, bu il Azərbaycanda keçiriləcək prezident seçkisi azad və ədalətli olsun». Bunu ABŞ-ın Azərbaycandakı səfiri Enn Ders bəyan edib: «Biz qarşıdan gələn seçkinin azad və ədalətli keçirilməsinin təmin olunmasına kömək etmək niyyətindəyik. Vətəndaş cəmiyyəti demokratik siyasi proseslər və vətəndaşların seçkidə daha da fəal iştirakının təşviqində mühüm rol oynayır».
Martın 3-də Amerika səfirliyi Demokratiya Komissiyasının Kiçik Qrantlar Proqramına yeni dəyişiklikləri elan edib. Bu proqram yerli qeyri-hökumət təşkilatlarına demokratiya sahəsində ABŞ-ın maliyyəsi və texniki dəstəyi ilə layihələr işləməyə imkan verir.
E.Ders deyib ki, demokratiyanın inkişafı üçün vətəndaş cəmiyyətinin gücləndirilməsi vacibdir. 2008-ci ildə Azərbaycanda prezident seçkisi olacağı üçün Amerika səfirliyi bu proqrama dəyişikliklər etməyi nəzərdə tutub. Yeni qaydalara görə, QHT-lər ildə iki dəfə yox, bütün il ərzində demokratiya və seçki ilə əlaqədar istənilən layihələrini təqdim edə bilərlər. Bundan əlavə, regional QHT-lər üçün də proqramda iştirak qaydaları sadələşdirilib.
Səfir onu da deyib ki, Amerika səfirliyi qarşıdakı seçkilərlə əlaqədar tədbirlər proqramı hazırlayacaq.
ABŞ səfirliyinin Demokratiya Komissiyasının Kiçik Qrantlar Proqramı 1997-ci ildən həyata keçirilir. İndiyədək proqramla 240-dan çox layihəyə 2.4 milyon dollar dəyərində maliyyə ayırıb. Proqramın bu ilki büdcəsi 350 min dollardır.
