Tehranın Elm və Sənət (Sənaye) Universitetinin azərbaycanlı tələbələrindən biri fevralın 24-də universitet zalında çıxış edən Xarici İşlər Nazirinə İran İslam Respublikasının müsəlman Azərbaycanın ərazisini işğal edən Ermənistanla səmimi münasibətlərinin səbəbi haqda sual verib.
İranın Xarici İşlər naziri Mənuçehr Mottəki isə sualı cavabsız qoyub və dərhal zaldakı müxbirlərdən istəyib ki, tədbirin bu hissəsini lentdən silsinlər.
Xəbəri Tehranın Elm və Sənət Universitetinin azərbaycanlı tələbələri tərəfindən nəşr edilən «Günəş» saytı yayıb.
Məlumatda bildirilir ki, Mənuçehr Mottəkinin sualı rədd etməsi və açıq-aşkar senzura təklifi zaldakı azərbaycanlı tələbələrini daha da qəzəbləndirib. Onlar ayağa qalxaraq «Qarabağ müsəlman dünyasının ayrılmaz hissəsidir» deyə İslam Respublikasının xarici siyasətinə etirazlarını bildiriblər.
Saytının verdiyi məlumata görə, azərbaycanlı tələbələr şüarlar səsləndirərək zalı tərk edib. Tələbələr həmin gün Tehrandakı Ermənistan səfirliyinin qarşısında keçirilən Xocalı faciəsinin anım mərasiminə qoşulublar. Bu mərasim hər il eyni yerdə qeyd edilir.
