Azərbaycanın Xarici İşlər Nazirliyi Ermənistanda keçirilən prezident seçkiləri zamanı Azərbaycanın işğal olunmuş ərazilərində-Dağlıq Qarabağda və ətraf rayonlarda seçki məntəqələrinin yaradılması və orada «səsvermənin» təşkili ilə bağlı ATƏT, Avropa Şurasının Parlament Assambleyası, Avropa Parlamentinə nota göndərib.
Nazirlik notada bildirir ki, bu akt Azərbaycan ərazilərinin Ermənistan tərəfindən işğalı faktını bir daha təsdiqləyir.
XİN qeyd olunan beynəlxalq qurumlardan bu qeyri-qanuni aktı diqqətlə araşdırmağı, öz hesabatlarında nəzərə almağı və müvafiq ölçülər götürməyi xahiş edib.
Ermənistanda fevralın 19-da prezident seçkiləri keçirilib. Rəsmi məlumatlara görə baş nazir Serj Sərkisyan səslərin 52%-dən çoxunu toplayaraq qalib gəlib. Ölkə müxalifəti isə seçkinin nəticəsini tanımır.
Ermənistan Azərbaycan ərazisinin 20 faizini - Dağlıq Qarabağı və onun ətrafındakı yeddi rayonu işğal edib.