Ermənistanda prezident seçkisində Serj Sərkisyan qələbə çalıb. Bunu Ermənistan Mərkəzi Seçki Komissiyası elan edib. Komissiyanın məlumatına görə Sərkisyan səslərin 52%-dən çoxunu yığıb.
İkinci yerdə keçmiş prezident Levon Ter-Petrosyan gəlir. O, 21,5% səs toplayıb.
Levon Ter-Petrosyanın təşəbbüsü ilə Yerevanda müxalifət etiraz aksiyası keçirir. Mümkün iğtişaşların qarşısını almaq üçün şəhərdə təhlükəsizlik tədbirləri gücləndirilib. Prezidentin iqamətgahı, parlament binası və başqa dövlət binaları ətrafında polis dəstələri, zirehli maşınlar düzülüb.
***
Serj Sərkisyan 1954-cü ildə Dağlıq Qarabağda anadan olub. Yerevan Dövlət Universitetini bitirib. 1993-cü ildə Ermənistanın müdafiə naziri təyin edilib, daha sonra daxili işlər və milli təhlükəsizlik naziri vəzifələrində çalışıb.
2007-ci ildən Ermənistanın baş naziridir. Respublika Partiyasının sədridir. Evlidir, iki uşağı var.
