Görüş təşəbbüsü ilə AŞPA-dakı Qarabağ üzrə alt-komitənin rəhbəri lord Rassel Conston çıxış edib.
O, fevralın 8-də Bakıda parlamentin komissiya rəhbərləri ilə danışıqlar aparıb və deputatları aprel ayında erməni həmkarları ilə birgə konfransda iştirak etməyə çağırıb. Conston deyib ki, Qarabağ üzrə alt-komitənin gələcək taleyi də bu görüşdən asılıdır. Çünki qurumun məqsədlərindən biri iki ölkənin deputatlarını görüşdürməkdir.
Rəbiyyət Aslanova: «Lord Conston təklifini irəli sürdü və dedi ki, parlament üzvləri arasında əməkdaşlıq qurmaq istəyir. Amma münaqişənin həllində irəliləyiş yoxdursa, heç bir əməkdaşlıqdan söhbət gedə bilməz. Biz belə görüşlərin uğuruna inanmırıq».
Deputat Asim Mollazadə isə deyir ki, Milli Məclis üzvlərinin ermənistanlı həmkarları ilə görüşmək istəməmələri Azərbaycandakı ictimai təzyiqlə bağlıdır. Mollazadə onu da deyir ki, məsələ açıq qalıb konkret qərar qəbul olunmayıb.