Fevral 2-də Azərbaycanı «Eurovision-2008» mahnı müsabiqəsində ilk dəfə təmsil edəcək müğənnilərin final seçimi olacaq. Serbiyada keçiriləcək yarışa qatılmaq üçün üç gənc ifaçı- Elnur Hüseynov, Aynur İsgəndərli və «Unformal» (rok qrup) mübarizə aparacaqlar.
Heydər Əliyev adına İdman Konsert Kompleksində baş tutacaq tədbirə giriş pulsuzdur. Konsertdə müxtəlif illərdə sözügedən müsabiqəsinin qalibi olmuş Sertap Erener, Ruslana, Mariya Şerifoviç də qatılacaqlar.
Bu barədə İctimai Televiziyanın direktoru İsmayıl Ömərov yanvarın 24-də keçirdiyi mətbuat konfransında məlumat verib. O, deyib ki, tədbiri dünyanın tanınmış telekanalları da yayımlayacaq.
Müsabiqədə ölkəni təmsil edəcək şəxsi münsiflər heyəti müəyyənləşdirəcək.
53-cü «Eurovision-2008» müsabiqəsinin yarımfinalı mayın 20 və 22 keçiriləcək.
«Eurovision-2008» mahnı müsabiqəsində 43 ölkə iştirak edəcək. Azərbaycan və San-Marino ilk dəfə müsabiqədə təmsil olunacaqlar.
