«Təhsil haqqında» qanun əsasında icra orqanları arasında vəzifə bölgüsü aparılması düzgün deyil. Bu səlahiyyət yalnız prezidentə məxsusdur.
Tələbə Qəbulu üzrə Dövlət Komissiyasının (TQDK) sədri Məleykə Abbaszadə Milli Məclisin müzakirəsinə təqdim edilən «Təhsil haqqında» qanun layihəsinə münasibət bildirərkən belə deyib.
Komissiya sədri ali məktəblərə qəbul qaydalarının dəyişilməsi haqda deyilənlərə də birmənalı yanaşmayıb. O, bildirib ki, əgər Azərbaycanın ali məktəbləri Bolonya prosesinə qoşulursa, beynəlxalq standartlara uyğun olan hansısa mexanizmi dəyişib keçmiş mexanizmə qayıtmaq heç bir məntiqə sığmır.
M.Abbaszadə qanun layihəsində məktəblərdə hicaba qoyulan qadağını düzgün hesab etmədiyini deyib: «Hicab hər bir kəsin fərdi seçimidir. Ölkə Konstitusiyasına əsasən, dinindən və əqidəsindən asılı olmayaraq, hər bir kəsin təhsil almaq hüququ var».
«Təhsil haqqında» qanun layihəsi dekabrın 28-də Milli Məclisin müzakirəsinə çıxarılacaq.
Komissiya sədri gələn il üçün ali məktəblərə sənəd qəbulu sahəsində bir sıra yeniliklərin olacağını da söyləyib. Belə ki, TQDK sənəd qəbulunun internet vasitəsilə həyata keçirməyi planlaşdırır.
