«Azadlıq» qəzetinin həbsdə olan baş redaktoru Qənimət Zahid sona qədər aclığı davam etdirmək niyyətindədir. Bunu «Azadlıq» radiosuna dekabrın 13-də Qənimət Zahidlə görüşən vəkil Elçin Sadıqov deyir.
Vəkilin sözlərinə görə onların iştirakı ilə baş redaktor həkim müayinəsindən keçib. Müayinədə məlum olub ki, Qənimət Zahid aclıq etdiyi bu 5 gündə 6 kiloqram arıqlayıb:
«Həkim dedi ki, Qənimət Zahid aclığı davam etdirsə 2-3 günə onun səhhətində ciddi problemlər yaranacaq. Qənimət müəllim isə deyir ki, aksiyanı sona qədər davam etdirəcək».
Qənimət Zahid mətbuata təzyiqlərə son qoyulması tələbi ilə aclıq aksiyası keçirir. 10 yaxın jurnalist də aclıq aksiyası keçirərək onunla həmrəy olduqlarını bildirirlər.
Qənimət Zahidin istintaqı isə artıq başa çataraq məhkəməyə göndərilib. O, xuliqanlıqda və qəsdən bədənə orta-ağır xəsarət yetirməkdə ittiham edilir.
