Dekabrın 6-da Yasamal Rayon Məhkəməsi «Azadlıq» qəzetinin həbsdəki baş redaktoru Qənimət Zahidin şikayətinə baxıb. Zahidin vəkili Elçin Sadıqov istintaqın qanunsuz hərəkətlərindən şikayət etdiklərini, istintaqın birtərəfli aparılması barədə kifayət qədər sübutları olduğunu deyir: «Biz müstəntiqin qanunsuz hərəkətlərindən şikayət etmişdik. Amma məhkəmə şikayətimizi təmin etmədi».
Vəkil deyir ki, məhkəmənin bu qərarından da apellyasiya şikayəti verəcəklər.
«Azadlıq» qəzetinin baş redaktoru Qənimət Zahid noyabrın 11-də iki aylığa həbs olunub. Ona qarşı xuliqanlıq və az ağır xəsarət yetirmə ittihamları irəli sürülüb. Baş redaktorun həbs-qətimkan tədbirinin dəyişdirilməsi və girov müqabilində azadlığa buraxılması barədə şikayətləri də təmin edilməyib.
