Türkiyə İraqın şimalında kürd yaraqlılarına zərbə endirib

Dekabrın 1-də Türkiyə ordusu İraqın şimalında hərbi əməliyyata başlayıb.

Məlumatı Türkiyə ordusunun Baş Qərargahı yayıb.

Məlumatda deyilir ki, əməliyyat İraqda yeri bəlli edilən 50-60 yaraqlıya qarşı aparılıb.

Türk hərbçiləri İraq ərazisinə keçməyiblər. Əməliyyat artilleriya və hərbi aviasiyanın dəstəyi ilə həyata keçirilib.

Oktyabrın 17-də Türkiyə parlamenti orduya İraqın şimalında kürd separatçılarına qarşı əməliyyat aparmağa icazə verib.

Hərbi əməliyyatın keçirilməsi haqda qərar isə noyabrın 30-da Türkiyə hökumətinin iclasında qəbul edilib.

Hazırda İraqla sərhəddə 100 minə qədər türk hərbçisi cəmləşib.

Kürd Fəhlə Partiyası – PKK 1984-cü ildən Türkiyənin cənub-şərqində kürd dövləti yaradılması uğrunda silahlı mübarizə aparır. O vaxtdan bəri müxtəlif toqquşmalar nəticəsində regionda bəzi hesablamalara görə, 37 mindən çox insan həlak olub.