FİFA prezidenti Yozef Blatter və UEFA-nın rəhbəri Mişel Platini AFFA-nın yeni iqamətgahının açılışı mərasimində iştirak ediblər. Açılış mərasimi zamanı AFFA-nın baş katibi Elxan Məmmədov bu günü Azərbaycan futbolu üçün tarixi bir gün adlandırıb.
«FİFA və UEFA Azərbaycan futboluna böyük dəstək göstərirlər. FİFA və UEFA-nın birbaşa iştirakı ilə «Qol və xett-trik» proqramı həyata keçirilir, 40 sintetik meydança yaradılıb» - deyə Məmmədov bildirib.
Daha sonra isə Platini çıxış edərək bildirib ki, assosiyasiyalara kömək göstərilməsi UEFA və FİFA-nın prioritetlərindəndir. Azərbaycan bu sahədə istisna deyil. Yozef Blatter öz həmkarının fikirlərini dəstəkləyərək ümid etdiyini bildirib ki, AFFA-nın yeni iqamətgahı Azərbaycan futbolunun gələcək uğurları üçün təməl rolu oynayacaq.
