Türkiyə İranla iqtisadi əlaqələri dayandırmaq niyyətində deyil

«Türkiyə energetika sahəsində Tehranla əməkdaşlığı dayandırmayacaq».

Bunu Baş nazir Rəcəb Tayyip Ərdoğan ABŞ Dövlət katibinin müavini Nikolas Bernsin çağırışına cavabında deyib. Cənab Berns sentyabrın 19-da Türkiyəyə səfəri zamanı Ankaranı İrana qarşı yeni sanksiyalara qoşulmağa çağırmışdı. İran özünün nüvə proqramını dayandırmaq istəmir.

Ərdoğan deyib: «İran və Rusiya ölkəmizə əsas təbii qaz tədarükçüsü olaraq qalır. Energetika sahəsində əməkdaşlığın dayandırılmasından danışmaq qeyri-mümkündür, çünki bu, ölkə iqtisadiyyatına sağalmaz yara vura bilər».

Ötən yay Tehran və Ankara İran qazının uzunmüddətli tədarükü haqda ilkin razılaşma imzalayıblar. Türkiyənin enerji tələbatının böyük hissəsini İran ödəyir.

Yerli KİV-lər yazırlar ki, Türkiyə hökumətində İran probleminə baxışlar fərqlidir. Bundan bir gün əvvəl Nikolas Bernsin bəyanatını şərh edən Türkiyə Xarici İşlər Nazirliyinin nümayəndəsi demişdi:

«Hər bir ölkə qurban verməlidir. Bu, yalnız Türkiyəyə yox, bütün ölkələrə aiddir. Bəlkə də, biz nüvə işlərini davam etdirən İranla uzunmüddətli neft və qaz müqavilələrinə yenidən baxmalıyıq».