Azərbaycan ərazisində güclü şimal-qərb küləyi sentyabrın 18-də zəifləyəcək. Keçən gecə və səhər Bakıda və Abşeronda küləyin maksimum gücü saniyədə 30-35 metrə, Mingəçevirdə 30 metrə, Tərtərdə 25 metrə, Bərdədə 22 metrə, Gəncə və Zərdabda 20 metrə çatıb.
Bu barədə «Turan»a Ekologiya Nazirliyinin Milli Hidrometeoproqnozlar Departamentinin direktor müavini Umayra Tağıyeva bildirib. Onun sözlərinə görə, sentyabrın 18-də şimal-qərb küləyi şimal-şərq küləyi ilə əvəz olunacaq və onun gücü saniyədə 8-12 metrə qədər azalacaq. Bakıda və Abşeronda sentyabrın 18-də hava temperaturu +25-27 dərəcə, aran rayonlarında +26-31, dağlıq rayonlarda +15-20 dərəcə təşkil edəcək.
21 sentyabr da daxil olmaqla sonrakı günlərdə havanın temperaturu daha bir neçə dərəcə artacaq və iqlim norması çərçivəsində dəyişəcək. Bu müddətdə Bakıda və Abşeronda hava +27-32 dərəcəyə qədər isinəcək.
