Bakı şəhərinin nəqliyyat infrastrukturunun təkmilləşdirilməsi barədə prezident sərəncamına görə, Nərimanov rayonu qəbiristanlığının bir hissəsi köçürülür. Bu qəbiristanlıqda müsəlmanlarla yanaşı, xristianlar, yəhudilər də dəfn edilib.
Biz ərazidə olarkən xristian qəbirlərinin söküldüyünün şahidi olduq. Qəbirlər təzə olsa da onların bəzilərinin sahibləri gözə dəymirdi. Yaxınlarının qəbrinin nə zaman söküləcəyini, onların harada yerləşdiriləcəyini öyrənməyə gəlmiş vətəndaşlar isə qəbirlərin belə xəbərsiz sökülməsinə etiraz edirdilər.
«Mən Bakıya bu gün gəlmişəm. Atamın, anamın, nənəmin, xalamın qəbirləri hələ dağıdılmayıb. Dayımın qəbri olan ərazi isə artıq xarabalığa çevrilib. Ətrafda hər şey dağıdılıb. Söz veriblər ki, qohumlarımın qəbrini sabah köçürəcəklər. Mən burada təkəm. Yardım ala biləcəyim kimsə yoxdur».
Bakı sakini Marina Qordeyevanın da qohumları bu qəbiristanlıqda dəfn edilib. Bir il öncə xərçəngdən dünyasını dəyişmiş anasının qəbrinin köçürülməsini eşidən Marina əsəb gərginliyi keçirib.
«Səhərdən iki təzə meyit çıxarılaraq polietilen torbalarda yolun kənarına qoyulub. Meyitlər hələ bütünlüklə dağılmayıb. O, tərəfdə isə iki uşaq qəbri açılıb. Bir neçə saatdır qəbirlərdən çıxarılan meyitləri oradan götürən yoxdur. Onların yaxınları səhərdən idarənin qarşısındadırlar. Ancaq meyitlərin daşınmasını təmin edən tapılmır».
Qəbiristanlıqdan çəkilən yol əsasən təzə qəbirlər olan ərazidən keçdiyi üçün qəbirlər açılarkən ətrafı üfunət bürüyür. Bunu ərazidə yol çəkən fəhlələr deyir. Biz də burada üfunət qoxusundan və həşəratların çoxluğundan dayana bilməyib qəbiristanlığın nəzarətçisi Kamran Məmmədovun kabinetinə üz tutduq.
Kamran Məmmədov bu il avqustun 17-də Nərimanov İcra Hakimiyyətinin onlara qəbiristanlığın köçürüləcəyi haqda bildiriş göndərdiyini dedi. Köçürmə işlərinə avqustun 20-dən başlanıb. O, qəbirlərin pulsuz, bütün dini ayinlərə əməl edilməklə Hövsan Qəbiristanlığına köçürüldüyünü deyir.
Qəbiristanlığın ərazisində bir sıra obyektlərin tikildiyinin də şahidi olduq. Yaxınlıqda yerləşən qarajların sahiblərilə söhbətimizdə onlar burada yaşayış binası və Yanğından Mühafizə Xidməti üçün qarajlar tikildiyini öyrəndik.
Ərazidə xristian qəbirlərilə yanaşı 50-yə yaxın qaraj da sökülüb. Qalan qaraj sahiblərinə isə Bakı şəhəri İcra Hakimiyyətindən xəbərdarlıq gəlib.
Ərazidə yaşayış binaları tikildiyinə görə, qaraj sahibləri düşünür ki, qəbiristanlığın bir hissəsi deyil, hamısı köçürüləcək. [Şəkillər Media Forumundur]