Bakı şəhərinin mərkəzindəki dəniz limanı paytaxtdan Qaradağ rayonunun Ələt qəsəbəsinə köçürüləcək. Bu layihəni Cənubi Koreyanın «GS E&S» şirkəti təqdim edib.
Məsələ ilə bağlı sentyabrın 5-də prezident İlham Əliyevin sədrliyi ilə müşavirə keçirilib.
Prezident bildirib ki, yeni liman Azərbaycanın nəqliyyat imkanlarını genişləndirəcək. «Bundan əlavə, bu limanın başqa yerə köçürülməsinin məqsədlərindən biri də Dənizkənarı Milli parkın genişləndirilməsidir. Biz buna qısa müddət ərzində nail olmalıyıq».
«GS E&S» şirkətinin vitse-prezidenti bildirib ki, onlar dünyanın bir çox ölkələrində bu tipli layihələrin icrasında yaxından iştirak edirlər. Hazırda dünyanın 28 ölkəsində şirkətin nümayəndəlikləri fəaliyyət göstərir və 6 min peşəkar mühəndis heyəti çalışır. Şirkətin layihələri beynəlxalq standartlara uyğundur. Ələt qəsəbəsində inşa olunacaq yeni dəniz limanı həm kommersiya, həm istehsalat, həm də daşıma əməliyyatlarının həyata keçirilməsi baxımından böyük əhəmiyyətə malikdir. Şirkət rəsmisi deyib ki, layihə ekoloji cəhətdən də yüksək tələblərə cavab verir.