Yaxın vaxtlarda orta məktəb müəllimlərinin maaşı artırılacaq. Təhsil nazirinin müavini Elmar Qasımov BMT-nin Azərbaycan Nümayəndəliyinin avqustun 9-da Ümumdünya Gənclər Günüylə bağlı keçirdiyi tədbirdə belə deyib. Onun sözlərinə görə, ölkə prezidenti müəllimlərin sosial güzəranını yaxşılaşdırmaq üçün müvafiq sərəncam imzalayacaq.
Elmar Qasımov həmçinin ölkədə kompyuter proqramçılarına və təyyarəçilərə ehtiyac olduğunu bildirib: «Ölkəyə bu qədər təyyarə gətirilir, amma onları sürməyə mütəxəssis tapılmır». Cənab Qasımov onu da deyib ki, yaxın illərdə orta məktəblərdə peşə təhsilini yaxşılaşdırmaq və gəncləri həvəsləndirmək üçün kompleks tədbirlər həyata keçiriləcək.
Müəllimlərin əməkhaqqı sonuncu dəfə ötən ilin noyabrında artırılıb.
