Xəzərin şimal hissəsində, Qazaxıstanın ərazi sularında 26 Azərbaycan vətəndaşının olduğu üç gəmi saxlanılıb. Saxlanılanlardan qanunsuz tutulduğu bildirilən 10 ton nərə balığı götürülüb. Bu barədə Qazaxıstanın Kənd Təsərrüfatı Nazirliyindən məlumat verilib. Gəmilərdə həmçinin böyük miqdarda balıq tutmaq üçün tor, qarmaq aşkar edilib.
Azərbaycan vətəndaşları iyulun 22-si sahil mühafizə xidməti əməkdaşlarının keçirdikləri reyd nəticəsində tutulublar.
Mənbənin verdiyi məlumata görə, bütövlükdə Qazaxıstan sularında nərə balıqlarının qanunsuz ovu ilə məşğul olan və fərqləndirmə nişanı olmayan 17-yə yaxın gəmi müşahidə olunub. Lakin reyddə iştirak edən əməkdaşların sayının azlığı səbəbindən onlar yalnız azərbaycanlı balıqçılara məxsus olan üç gəmini saxlaya biliblər.
Məlumatı «Xəbərlər-Azərbaycan» yayıb.
