«Şahdəniz» yatağından qaz istehsal olunandan sonra Azərbaycanın qaz ehtiyatlarına maraq artıbdır. Ölkə hazırda 1,5 trilyon qaz ehtiyatına malikdir». Prezident İlham Əliyev GUAM dövlət başçılarının iyunun 19-da Bakıda keçirilən sammitindəki çıxışında belə deyib.
Dövlət başçısı deyib ki, qazı Avropa bazarlarına çıxarmaq üçün yüksək səviyyəli nəqliyyat dəhlizi Bakı-Ərzurum-Qars kəməri mövcuddur. «Bu ilin sonuna qədər Azərbaycan qazı Türkiyə və Yunanıstana veriləcək. Bununla da ölkəmiz Avropaya qaz ixrac edən ölkəyə çevriləcək». İlham Əliyev vurğulayıb ki, Azərbaycan enerji təhlükəsizliyi məsələsində Avropanın etibarlı tərəfdaşı olacaq.
Prezident GUAM ölkələrinin iqtisadi inkişafının yüksək olması ilə yanaşı, bir sıra problemlərin mövcudluğuna da toxunub. Təşkilatın üç üzvü Azərbaycan, Gürcüstan və Moldovanın ərazi bütövlükləri pozulubdur. «Bu problemləri həll etmək üçün GUAM ölkələri güclü dövlətə çevrilməlidir. İşğalçılar ərazidən çıxarılıb, separatizmin qarşısı alınandan sonra Avropa təcrübəsinə əsaslanaraq həmin ərazilərdə yüksək status məsələsi həll oluna bilər».
Polşa prezidenti Lex Kaçinski Odessa-Brodı kəməri ilə bağlı məsələyə toxunub. Cənab Kaçinski deyib ki, bu kəmərin problemi neftdir, o da GUAM-da tapıla bilər.
Sammitdə Ukrayna və Gürcüstan prezidentləri də çıxış ediblər.