«ABŞ Raket Əleyhinə Müdafiə planlarından imtina etməyəcək»

Qəbələ Radiolokasiya Stansiyasından müştərək istifadəyə dair Rusiyanın təklifi ABŞ-ın Şərqi Avropada Raket Əleyhinə Müdafiə sistemləri yerləşdirmək planlarına təsir etməyəcək.

Bunu «Associated Press» agentliyinə ABŞ-ın Dövlət katibi Kondoliza Rays deyib.

Rays Rusiya prezidentinin təklifini «sürpriz» adlandırıb. Deyib ki, bu təklif diqqətəlayiqdir. Amma:

«Biz Çexiya və Polşa ilə danışıqları davam etdiririk və etdirəcəyik. Biz təhlükəsizlik məsələsinin həlli baxımından nəyi yaxşı hesab ediriksə, onu edəcəyik» - deyə Rays əlavə edib.

Polşa prezidenti Lex Kaçinski isə istəyir ki, iyunun 18-də məsələni azərbaycanlı həmkarı İlham Əliyevlə danışsın.

Bu haqda da «Associated Press» xəbər verir. Kaçinski bunu Varşavada Amerika prezidenti Corc Buşla danışıqlardan sonra deyib.